AMED - Aktîvîsta TJAye Elîf Turane polîtîkayê bêcezaverdayîşî yê îqtîdar û muhakemekerdişî ercnaye û vat ke amancê înan no yo ke qirkerdişê cinîyan awan bikerê û dîyar kerd ke vera nê qewimîyayîşan de têkoşînê cinîyan dewam keno. 

 

Bajarê Kurdistan û Tirkîya de şîdetê camêrdî her ke şino zêde beno û bi taybetî polîtîkayê bêcezaverdayîşî cesaret dano kerdoxan. Kerdox bi cezayê sey xelatî yenê xelatkerdiş, dima ra tehlîye benê û şîdetê xo dewam kenê. Aktîvîsta Têgêrayîşê Cinîyê Azade (TJA) Elîf Turane polîtîkayê bêcezaverdayîşî yê îqtîdarî-camêrd-muhakemeyî ercnaye. 

 

Elîfe dîyar kerd ke polîtîkayê bêcezaverdayîşî tena serbestvedayîşê kerdoxan ra pê nîno û eynî wext de kerdox yenê pawitiş û vat: “Kerdoxî cînayet kenê, îstîsmar kenê û dima ra mehkema de pê kravat gêrenê, vatişê dînî vajenê û netewperestîyê xo pawenê. Polîtîkayê bêcezaverdayîşî esasê xo de seba pawitişê camêrdî yeno kerdiş.”

 

‘Peymana Stenbolî seba pawitişê kerdoxan ame feshkerdiş’ 

 

Elîfe dewamê qiseykerdişê xo de vat ke bêcezaverdayîş camêrdî teşwîqê sucî keno û efu nêbo zî bi raştkerdişê qanûn û fînayîşê cezaye nê çî yeno ciwîyayîş. Elîfe bale ant serê Peymana Stenbolî û vat ke peymana Stenbolî seba pawitişê camêrdî ame feshkerdiş. Elîfe wina dewam kerd: “Cinî êdî bi muhakemerdişî bawer nêkenê. Cinîyê ke seba pawitişî muracat kenê, eke reyna raştê şîdetî bêrê êdî nêşinê eynî mercî. Hêzê asayîşî cinîyan îqna kenê û şirawenê keyeyê înan. Wexto ke na rewşe wina bena şîdetê serê cinîyan zî zêde bena û ver bi qetilkerdişê înan ra şina. Peymana Stenbolî de qerarê dûrîfînayîşê 6 aşman estbî. Cinî 6 aşman ci ra fêde girewtêne. Qanûnê 6284î zî tay bo zî nê çîyan ra pê yeno.”

 

‘Do têkoşînê ma dewam bikero’ 

 

Elîfe dewamê qiseykerdişê xo de dîyar kerd ke bi bahaneyê pandemî kerdoxî zîndanan ra ameyî vetiş û vat: “Wextê pandemî de kerdoxî serbest ameyî verdayîş. Cinî şîdetî reyde rî bi rî mendî. Cinî zanayêne ke do rewşêke winasî bêra ciwîyayîş. Wexto ke rewşe wina bî cinî nêeşkayî xo bipawê. Vera sucê hemverê cinî û tutan de cezayêke bi tesîrin çin a. Kerdoxî zîndanê sey akerdeyan de yenê tepiştiş û coka ra zî wexto ke vejîyenê reyna suc kenê. Ma dezgehê cinîyan û çapemenîya azade rê nê çîyî anê ziwan. Do têkoşînê ma dewam bikero. Zîhnîyeto serdest polîtîkaya ke camêrdî paweno rayîr ra beno.”

 

‘Wa destê xo qanûnê 6284î ra biancê’ 

 

Elîfe qiseykerdişê xo yê peyênan de bale ant serê metodê têkoşînî yê vera polîtîkayê bêcezaverdayîşî û wina vat: “Nika derheqê ancîyayîşê qanûnê 6284î de munaqaşa yeno kerdiş. AKP-MHP û tîfaqê xo hewl danê qanûn wedarnê. Gelo do senî serê qetilkerdişê cinîyan û îstîsmarê tutan de çim û goşanê xo bigîrê. Heta ke Peymana Stenbolî tepîya nêra do qetilkerdişê cinîyan dewam bikero. Ganî dewlete na babete de gamêke bierza. Ganî dest qanûnê 6284î ra bêro ancîyayîş.”