Rozerîn Gultekîn

 

AMED - Unîversîteya Dîcleye de wendekarê ke wargehî ra heta dinge her raşteyî de probleman ciwîyenê û destdergîye reyde rî bi rî manenê, hewl yeno dayîş ke bi TOMAyan asayîşê înan pê bêro. Endama Paştîdayîşê Wendekarê Azade ya Unîversîteya Dîcleye Elîf Tane vera bêçareserîyan qisey kerd û da zanayîş ke ê bi xoserbîyayîş eşkenê asayîşê xo pê bîyarî û problemê xo çareser bikerê. Elîfe venga rêxistinbîyayîşî kerd. 

 

Qezaya Efelerî ya Aydinî de Wargehê Wendekarê Kêna yê Guzelhîsarî yê KYKyî de 25ê teşrîna verêne de asansor kewtbî war û wendekara unîversîteya Adnan Menderesî dinyaya xo bedilnabî. Reaksîyonê vera qewimîyayîşî dewam kenê û tersê wendekaran ê ke wargehan de manenê zî zêde bîyî. Dimayê mergê Zerene wendekaran dîyar kerd ke wargehan de îhmalkarîyêk gird esto û problemanê ke ciwîyenê ardî ziwan. Dimayê mergê Zerene qewimîyaîşêk ke maneno ê Zerene qewimîya. Wargehê KHKyî yê Fatsa yê Orduyî de 30ê teşrîna verêne de pê ame. Asansor qata çarine ra kewt war û 4 wendekarî wedarîyanî nêweşxane. Rojanê verênan de Amed de wendekara ke Wargehê Wendekarê Kêna yê Îyaz Bîn Ganemî de manena, wexto ke şîyêne wargeh ameye tacîzkerdiş. Wendekaran vera nê qewimîyayîşî de KHK û unîversîteye de çalakî pê ardî. 

 

Dimayê Zerene asansoro xeripnaye ame girewtiş 

 

Wendekaran derheqê problemê unîversîte û wargehî de qisey kerdî û dîyar kerdî ke Wargehê Wendekarê Kêna yê Îyaz Bîn Ganemî cayêk bêveng o û simayê saet 20.00î otobus nêşino wargeh. Netîceyê îhmalkarîye de wendekarêk ameye tacîzkerdiş û wendekarî bi rojan o vera nê qewimîayayîşan de çalakî de yê. Polîsî bi rojan o nê semedî ra kişta wargehî de vindenê. Wendekaran da zanayîş ke asansorê wargehê Suleyman Bîn Halîdî yê Kênayan ke 11 qatin o xeripnaye yo û xeylê reyan muracat kerdî, la tedbîrêk hema zî nêameyo girewtiş. Wendekaran vat ke dimayê mergê Zerene asansorê wargehê înan ameyo girewtiş. 

 

Vera tacîzan de cewab 

 

Wendekarê ke nêwaştî asayîş vera nameyê xo bidî pare kerdî ke yew problemê bîn ê wendekaranê KHKyî no yo ke camêrdê ke seba tamîratî yenê odeyê înan nizdîbîyayîşêk ke reseno tacîzî nîşanê înan danê û îdare çîyêk nêkeno. Sewbîna zî wendekaran dîyar kerd ke werdê înan xeylê xirab ê û înan mird nêkeno. 

 

‘Unîversîte bîyo sey qereqolî’ 

 

Endama Paştîdayîşê Wendekarê Azade ya Unîversîteya Dîcleye Elîf Tane derheqê çîyê ke wendekar ciwîyenê de qisey kerd û da zanayîş ke AKP-MHP seba lazimî û waştişê wendekaran polîtîkayan pê nêano, goreyê profîlê xo polîtîkayan serê ciwanan de rayîr ra beno. Elîfe ercnayîşê xo wina vat: “Îqtîdar wazeno ciwananê ke cipersayîş nêkeno, sere çewt keno awan bikero. Sîstemo ke ciwanan cuye ra dûrî keno esto. Unîversîte bîyî sey qereqolan. Çalakîyan de 10 qatê wendekaran polîs estê. Peynîya unîversîte de cayê têgêrayîşê taybet ê unîversîte esto. Ma bi vengê tanq û topan kewenê dersan. Bi taybetî wendekarê cinî hedef yenê girewtiş. Semedo ke ma cinî serkêşê embazanê xo yê cinî yê.” 

 

‘Binê nameyê ‘ofîsê ciwan de’ asîmîlasyon’ 

 

Elîfe problemê unîversîteya Dîcle û KHKyî ercnaye û wina vat: “Her roje problemê newe vejîyenê. Coka ra ma xeylê probleman netîceyê tesadufan de musenê. Herinda ke raşteyê xoser û azade bibê, bîyî cayê vînîkerdişan, tacîz û cînayetî. Rektorê qeyûm binê nameyê ‘ofîsê ciwanan’ de ke kursê ziwan û falîyetê sporî yenê dayîş de ciwanan asîmîle keno. Problemê tewr muhîm ê wendekaran asayîş o. Problemê asayîşê bi TOMA û polîsan çareser nîyo.”

 

‘Azadbîyayîşê ciwanan azadbîyayîşê komelî yo’

 

Elîfe peynîya qiseykerdişê xo de wina vat: “Dimayê Zerene dinyaya xo bedelnaye, wendekarî vejîyayî wareyan. No hêrsê bi serran bi. Wina reyke de nêame awankerdiş. Serkewtiş bi ciwanê rêxistinkerde mumkin o. Ma do xo bi rêxistin bikerê, ma do bieşkê probleman çareser bikerê. Ma sloganê ‘bi unîversîteya xoser azad reyde komeleyê demokratîk’ xebatan kenê. Azadbîyayîşê ciwanan azadîya komelî yo. Sere de cinîyê ciwanî ganî pêro ciwanî bêrê Paştdayîşê Wendekarê Azadan ê Unîversîteya Dîcleyî. Ma do xo bi rêxistin bikerê ma do bieşkê probleman çareser bikerê.”