AMED - Wendekare Zeren Ertaşa ke netîceyê kewtişê asansorê yurdê KYKyî de dinyaya xo bedilnaye rewşa şertê perwerdeyî reyna arde rojeve. Hemsereka Şûbeyê hûmara Yewine a Egîtîm Senî ya Amedî Emîne Akşahîne dîyar kerd ke herinda ke wendekarî bêrê pelçiqnayîş û bêvengkerdiş ganî bêrê goşdarîkerdiş û seba çareserîye ganî gamî bêrê eştiş. 

 

Qezaya Efelerî ya Aydinî de Yurdê Wexdekarê Kêna yê Guzelhîsarî yê KHKyî de 25ê teşrîna verêne de asansore kewtbî war û wendekara Unîversîteya Adnan Menderesî dinyaya xo bedilnabî. Reaksîyonê vera qewimîyayîşî dewam kenê û tersê wendekarê ke yurdan de manenê zêde beno. Dimayê mergê Zerene, wendekaran dîyar kerd ke yurdan de îhmalkarîyêk gird esto û problemê ke ciwîyenê ardî ziwan ser. Dimayê mergê Zerene, qewimîyayîşêk ke manenê sey aye yurdê KHKyî yê Fatsa yê Orduye de 30ê teşrîna verêne de pê ame. Kindirê asansorî qerifîya û katê çarine ra kewtbî war. Wendekarê tede zî wedarîyabî nêweşxane. 

 

Hemsereka Şûbeyê hûmara Yewine ya Sendîkaya Kedkarê Perwerde û Zanistî (Egîtîm Sen) ya Amedî Emîne Akşahîne derheqê problemê wendekaran de qisey kerd. 

 

 'Yurdan de merg zêde bî’ 

 

Emîneye da zanayîş ke yurdê dewlete de merg zêde bîyo û derheqê prosesî de hêvîya ciwanan nêmenda û vat: “Na rewşe ciwanan ver bi xokiştişî ra bena. Demê peyênan de întîxar zêde bîyo. Wendekare Zerene netîceyê kewtişê asansorê yurdê KHKyî de dinyaya xo bedilnaye. Her çend ke qewimîyayîşî ra çend hewte verê cû wendekarî bivajî asansor xeripnayeyo zî na babete de gamêke nêameye eştiş. Çi hewf o ke bî sebebê mergê wendekarêke û birîndarbîyayîşê 15 wendekaran. Sewbîna zî mîyanê roje de yeno dîyîş ke bi desan reyan asansor yeno şuxilnayîş. La mudaxale nêkenê.”

 

 ‘Muhîmîya ke îqtîdar dano wendekaran no yo’

 

Emîneye ard ziwan ke dewlete yurdê xo de muhîmî nêdana wendekaran û wina dewam kerd: “Yurdê Kredî aîdê dewlete yê. Bi hezaran wendekarî seba ke nê yurdan de bimanê kewenê dore. Ma zanê ke ciwanî seba nê yurdan hewl danê. Semedo ke yurdê dewlete yê. La çi heyf o ke îqtîdar muhîmî nêdano wendekaran. Netîceyê nê qewimîyayîşan ra her çî asîyeno.” 

 

 ‘Reyna wendekar ameyî sucdarkerdiş’ 

 

 Emîneye qiseykerdişê xo yê peyênan de dîyar kerd ke cewabê berpirsîyaran ê ke semedê nê qewimîyayîşî dayî şaş ê û vat: “Dewlete cewabê seke qewimîyayîş teberê înan de pê ameyo da. Eşkerayîyê ke berpirsîyarî fînayî serê milê wendekaran dayî. Dimayê Zerene her ca de çalakî ameyî kerdiş. Wendekarî şikanê xo anê ziwan. Dîyar kenê ke mobîng û tacîz bi înan yeno kerdiş, cayê wargehî çin o. Ciwanê ma nê prosesî de tayna ganî vengê xo berz bikerê û sere wedarnê. Ez veng kena ke ganî bi lez fek nê polîtîkayanê pelçiqnayîş û hêrişan ra bêro verdayîş. Herinda ke wendekarî bêrê tersnayîş û pelçiqnayîş ganî bêrê goşdarîkerdiş. Seba çareserîya probleman ganî game bêro eştiş.”