ANQARA - Hemvervatoxa HEDEPî Ayşegule Dogan kombîyayîşê çapemenîye de pare kerd ke heta ke meseleya kurdan çareser nêba Tirkîya qetî demokratîk nêbena. 

 

Hemvervatoxa Partîya Têdûştîye û Demokrasîyî ya Şaran (HEDEP) Ayşegule Dogan Merkezê Pêroyî yê HDPyî de kombîyayîşê çapemenîye serûber kerd û rojdem ercna. Ayşegule derheqê serrgêra 4ê Teşrîna Peyêne 2016 ke siyasetmedarê sey Selahattîn Demîrtaş, Fîgen Yuksekdag û parlamenterê HDPyî mîyan de ameyî tepiştiş de qisey kerd û waşt sîyasetmedarî ganî bêrê veradayîş.

 

‘Dewa semedê padayîşê HDPyî sebeb sebeb ameye mojnayîş’

 

Ayşegule kombîyayîş de nê babetan ser de vinderte: “4ê teşrîna peyêne ya 2016î de hemserekê HDPyî Fîgene Yuksekdag û Selahattîn Demîrtaş 12 wekîlanê ma reyde ameybî destbendkerdene û nînan ra 10 kesî tepişîyabî. Dima na hûmara tepişteyan bibî 15. Na darbeya sîyasîye 7 serrî yo dewam kena. Tewr peyêne embaza ma Huda Kaya tepişîyaye. Na darbeya sîyasîye hetê îqtîdarî ra yena kerdene ke partîya ma pê bêra çinkerdene. Coka Dewaya Kobanê dewaya dafik a. Na dewa de birê Mehkemeya Qanûnê Bingeyîyî (MQB) û birê Mehkemeya Heqanê Merdiman a Ewropa (MHME) zî nênê şinasnayene. Seba ke HDPyî weçînayîşanê 7ê hezîrana 2015î de rayê xo zêdînabî na darbe ameye kerdene. Weçînayîşanê 7ê hezîrane ra dima îqtîdarî prosesê çareserîye qedîna, qeyûmî tayînê şaredarîyanê ma ameyî kerdene, embazê ma tepişîyayî, şaristananê ma de qedexeyê tebervejîyayîşî ame îlankerdene, konseptê şerî ame newekerdene û Qirkerdişê Anqara ya 10ê Teşrîna Verêne qewimîya. Îqtîdarî bi nê hawayî darbeya 4ê teşrîna peyêne serûber kerde û Dewaya Kobanê akerde. Dewaya Kobanê hînî bîya semmbola çaresernêkerdişê meseleya kurdan.”

 

‘Do têkoşîn dewam bikero’

 

Ayşegule dîyar kerd ke sîyasetê partîya înan HEDEPî cesaret û bi qerardarî yo û vat: “HDP seba ke çareserîya demokratîke ya meseleya kurdan de isrardar o na dewa ameye akerdene. La tradîsyonê ma bi HEDEPî dewam keno. Sey HEDEPî ma meseleya kurdan de seba çareserîye qerardar ê. Ma do rixmê pêro teda, zorbazî, qedexe, dewa û operasyonan zî dewaya xo ra fek vera nêdê. Îqtîdar keno ke pê dişmenîya vera kurdan meseleya kurdan û şer dewam bikerê. La heta ke meseleya kurdan çareser nêba Tirkîya qetî demokratîk nêbena.”