Elfazî Toral

 

STENBOL - Hetgira Serekatîya Pêroyî ya Partîya Şorişger Gamze Taşciye da zanayîş ke bi îmzeyê ke eştî deklerasyonê ‘seba aştîye veng’ mesajê ‘ma paştîdayîş danî têkoşînê şarê Kurdî’ danî û vat ke azadîya fîzîkî ya Rayberê PKKyî Abdullah Ocalanî do probleman çareser bikera û venga têkoşînê hempare bi heme kesî kerd. 

 

Polîtîkayê şer û hêrişan ê îqtîdarê AKP-MHPyî Kurdistan û Tirkîya de roj bi roje giran benî û 33 aşmî yo Rayberê PKKyî Abdullah Ocalanî ra xebere nîna girewtiş. Tecrîdê Îmraliyî her ke şino giran beno û reaksîyonê vera nê dewam keno. 28ê Teşrîna Verêne de bi siloganê ‘seba aştîye veng’ Otelê Elîte Wordî yê Taksîmî de eşkerayîyêk çapemenîye ame dayîş. 78 kesî îmze eştî deklerasyonî û xeylê siyasetmedar, akademisyen, nuştox û hunermendî tewrê eşkerayî bîyî. 

 

Hetgira Serekatîya Pêroyî ya Partîya Şorişger Gamze Taşciya ke îmze eştbî deklaraysonê ‘seba aştîye veng’ derheqê venge de JINNEWSî rê qisey kerd.

 

‘Ma paştîdayîş danî têkoşînê şarê Kurdî’ 

 

Gamzeye dîyar kerd ke her hetî ra bi desan kesî îmze eştî deklerasyonê ‘seba aştîye veng’ û wina vat: “Amacê nê çîyî no yo; ma hetê waştişê şarê Kurdî de yî û ma paştîdayîş danî têkoşînê înan. Prosesê peynî de şer gur bîyo. Rojawan, Başûr û Rojhelatê Kurdistanî de vera Kurdan de hêriş pê yenî. Vera nê caardişan de ma mesajê xo da. Serewedarnayîşê Gezî û serewedarnayîşê şarî yê Kurdistanî ra heta nika zîhnîyetê serdest faşîsmê AKP-MHPyî hêrişê xo zêde kerd. Sundê çinîkerdişê têkoşînê şarê Kurdî werdî.”

 

‘Îqtîdar serê Rayberê şarê Kurdî ra mesaj dano’

 

Gamzeye qerarê 2014î ke Heyetê Asayîşo Neteweyî (MGK) dabî ard vîr û wina dewam kerd: “Bi qerarê planê çinîkerdişî yê MGKyî start ame dayîş. Aye roje ra heta nika bi taybetî herêma Rojawanî de qirkerdişêk çimsûre bi destê DAÎŞî ame kerdiş. Hemverê mîtîngê HDPyî de, hemverê ciwanan de hêriş pê aemyî. Konseptê hêrişan giran bî. Îqtîdar serê Rayberê şarê Kurdî ra mesaj dano.” 

 

‘Ma do têkoşînê azadîye de ca bigêrî’ 

 

Gamzeye bale ant serê deklerasyonî û vat: “Ma sey sosyalîstê Tirkîya û kesê ke îmze eştî deklarasyonî waşt ke paştîdayîşê xo seba şarê Kurdî bîyarî ziman ser.Têkoşînê şarê Kurd seba aştîye yo. Ma zî vanê ke kişta înan de yî û paştîdayîş danî têkoşînê înan. Ma zanê ke siyasetmedarê Kurd bîlasebeb tepişte yî. Ma kongreyê HEDEPî de zî mesajê xo yê ke ma tepîya game nêerzenî û ma do têkoşîn bikerî da. Ma do pîya cewab bidî tecrîdê Îmraliyî û hêrişê hemverê Rojawanî. Têkoşînê şarê Kurd ferz û meşru yo. Şarê Kurd nuqtaya ke Raybêrê înan tede yo de yo. Şarê Kurd Abdullah Ocalanî sey Rayber qebûl keno. Azadîya fîzîkî ya Ocalanî do çareserî bîyara.”