WAN - TJAye aşma diyîne ya kampanyaya ‘bi jin jiyan azadî reyde ver bi azadîye’ de bi şarî reyde atolyeyê têmîyan û xosere yena têkîşt. Cinî vera tecrîdê serê Rayberê PKKyî Abdullah Ocalanî rolê nêtêduştî komelî û şerê taybet bi felsefeya ‘jin jiyan azadî’ xobîyayîşî munaqaşa kenê. 

 

Têgêrayîşê Cinîyê Azade (TJA) 15ê êlule de bi sloganê ‘bi jin jiyan azadî reyde ver bi azadîye ra’ deklerasyonê xo eşkera kerd û dima ra startê kampanyaya xo da. Aktîvîstê TJAye çarçeweya kampanyaye de xebatê atolye yê perwerdeyî û rêxistinbîyayîşî rayîr ra berdî û bajar bi bajar bi cinîyan reyde ameyî têhet. Kampanya bi bernameyê cîya cîyayan yena rayîr ra berdiş. 

 

Têkoşînê azad, xo rêxistin kerd 

 

Aşma diyîne ya kampanyaye de bi tewrbîyayîşê partiyê siyasî, dezgehê cinîyan û rêxistinê komelê sivîlî atolyeyê xoser û têmîyan pê yenê. Bajarê ke tede atolye pê yenê ra yew zî Wan o. wan de vizêr awanîya Partîya Demokratîke ya Şaran (HDP) a Wanî de atolyeya xoser hetê cinîyan ra pê ame. Cinîyan atolyeye de tecrîdê serê Abdullah Ocalanî, tesîrê tecrîdî yê serê komelî û zîndanan, binpaykerdişê heqan ê zîndanan munaqaşa kerdî û derheqê polîtîkayê şerê taybetî yê herême de zî bale antî serê muhîmîya têkoşînê rêxistinkerde û azad. 

 

Vera şîdetî de: hişmendîya cînsîyetî 

 

Cinîyê ke tewrê atolyeyan bîyî babetê sey rexne û xorexnedayîşî de yew bi yew ercnayîş kerdî û astengîyê vernîya cinîyan qisey kerdî. Sewbîna atolye de şîdetê sistematîk, metodê têkoşîn û alternatîfî ameyî munaqaşakerdiş. 

 

‘Hişmendiya cînsîyetî ra haydar nîyê’ 

 

Sosin Oktaya 68 serrî ke tewrê atolye bî wina vat: “Cinî atolyeyan de vanê ke ganî ferqê hêzê xo de bê û nê esasî de aver bikewê. Seba ke cinî hêzê xo bizana ganî aktîf tewrê kampanyaya TJAye biba. Cinî xurt a. Cinî esta û do biba. Se ra 60ê cinîyan hişmendîya cînsîyetî danê. Seba ke bimusê û têbigêrê ganî xebatê TJAye de ca bigîrê.” 

 

Polîtîkayê şerê taybet 

 

Sosine bale ant serê polîtîkayê şerê taybet ê herême û vat ke raşte û taxan de tîryak zêde bîyo û wina dewam kerd: “Şuxilnayîşê tîryakî heta emrê 10î kewto. Cinî û dadî ganî baldar benê. Ganî xo vera înan de rêxistin bikerê. Ganî vernîya polîtîkayê şerê taybetî bigîrê.” 

 

Felsefeya ‘jin jiyan azadî’ dinya de vila bî

Sîyasetmedare Nazîme Arvase zî eşkera kerd ke Kurdistan de bi serran o zilm û teda estê û wina ercnayîş kerd: “Wayîrvejîyayîşê îradeyî berpirsîyarîya cinîyan o. cinî ganî wayîrê hişmendîya cînsîyet, kultur û ziwanî bî. Na çarçewa de rolê cinîyan mihîm o. Têkoşînê cinîyanê kurdan dinya de bi ‘jin jiyan azadî’ vila bî. Ewro Rojhelatê de ‘jin jiyan azadî’ sey felsefeya cinîyan vila bî. Na paradîgma hetê Rayberê PKKyî Abdullah Ocalanî ra pê ame. 32 aşmî yo ke Abdullah Ocalanî ra yew xeberêk nîna girewtiş. Tecrîdê giran ê serê Abdullah Ocalanî serê komelî de zî tesîr viraşto. Cinî ganî vera înan de baldar bî. Ganî ma wayîrê ziwanê xo bivejê. Tecrîd heta ser ziwanê ma de zî vila bîyo.”

 

‘Tecrîd dest rona her çîyê ma’ 

 

Nazîmeye ercnayîşê xo de wina vat: “Tecrîd wilayê her raşteyî bîyo. Ma vera înan polîtîkayan de nêvejê ma do hîna zêde bêrê înkarkerdiş. Ganî ma vera nê caardişan de têkoşîn bikerê. Ziwanê ma çinî bibo do nasnameyê ma zî çinî bibo. Cinî binê hêrişî de ya. Bi polîtîkayê şerê taybet cinîyan hedef gênê. Ganî cinî bibê xobîyayîş, xobîyayîş de bêrê têhet û polîtîkayê tecrîdî raşte ra wedarnê.”