Nazlican Nujîn Yildiz

 

ÎZMÎR - Tepişteyê nêweş Cemal Tanhano ke 29 serrî yo tepişte yo rewşa ci her ke şina giran bena. Ayşe Tanhane venga hîsgerîye rayaumûmîye rê kerd û vat: “Gelo wexto ke pîyê mi bimiro do vengê ma bêro eşnawitiş.”

 

Tepişteyo nêweş ê giran Cemal Tanhano 98 serrî taxa Çîmentepe ya Konakî ya Îzmîrî de serra 1994î de ame tepiştiş û îşkenceyê giran dî. Rewşa Cemal Tanhanî her ke şina giran bena. Cemal zîndanê sey Buca yê Îzmîr, Gîresun, Nazîlî, Kiriklarî de mendo. No 17 serrî yo zî zîndanê Tîpê Fyî yê Boluyî de tepişte yo. 23yê teşrîna verêne de felç derbaz kerd û wedarîya nêweşxaneyê Dewlete yê Îzzet Baysalî û 27ê teşrîna verêne de zî sewqê Beşê Cerahî yê Pêroyî yê Nêweşxaneyê Bajarî yê Eskîşehîrî ame kerdiş. ATK 2yê sibate de seba Cemal Tanhanî raporê eşkenê zîndan de bimano da. Kênaya Cemalî, Ayşe Tanhane derheqê rewşa pîyê xo de qisey kerd û bale ant serê bêvengîya ATKyî û vat ke ATK berê xo înan rê girewto û veng kerd ke ganî pîyê aye bi lez serbest bêro verdayîş. 

 

Xebera înan çinî bî ke wedarîyayo nêweşxane 

 

Ayşeye dîyar kerd ke pîyê aye serra 1994î de ameyo tepiştiş û xeylê reyna ameyo surgunkerdiş, tewr peynî zî surgunê zîndanê Tîpê Fyî yê Boluyî ameyo kerdiş û no 17 serrî yo ke uca de tepişte yo. Ayşeye wina vat: “Problemê weşîye xo da teber. Serra 2022yî de teşhîsê xeylê nêweşîyê sey zerrî, qeseba, pişik, safra kesesî ame kerdiş. La raporan de pîyê mi seba patolojî û bîyopsî nêbê nêweşê taqîpkerdişî. Serra peyêne de 30 kîlo da. Di hewte verê cû ma ci gêrayî. Vat ke ez do şima bigêra la mi wedaritî nêweşxane. Ez nêweşxane gêraya malumat nêdayî ma. Ma nêgêrayêne xeber nêdayêne ma. Pîyê mi hîrê rojî yo ke beşê ciewnayîşê giran de yo û malumatê ma çin o.” 

 

Seba rayaumûmî û TBMMyî vengdayîş    

 

Ayşeye vat nêweşîyan vera Bolu ra pîyê mi sewqê nêweşxaneyê bajarî yê Eskîşehîrî ame kerdiş û wina dewam kerd: “Kapasîteya Nêweşxaneyê Eskîşehîrî hîra ya. Se ra 90 bedenê pîyê mi de enfeksîyon ame dîyîş. Nêweşxaneyê Anqara hîna nizdî bî. La wedaritî Eskîşehîrî. Way û birayê mi bi desturê dozgerîye 25 deqe pîyê mi dîyî. Doktor vat rewşa ci xirab a. ez venga Meclîsê Tirkîya kena. Acaba pîyê mi bado ke bimiro şima do vengê ma bieşnawê?” 

 

ATK cevab nêda waştişnameyan 

 

Ayşeye qiseykerdişê xo yê peyênan de ard ziwan ke Komeleya Heqanê Merdiman (ÎHD) xeylê reyan waştişname daya ATKyî û dozgerîye la waştişname bê cewab mendê û wina vat: “Ma ATKyî ra cewab nêgênê. ATK beranê xo ma rê girewto. Parlamenterê HEDEPî êdî raporê pîyê mi gênê û danê ATKyî. Kes cewab nêdano ma. Ma vengê xo nêda eşnawitiş. Ez wazena tepişteyê nêweş serbest bêrê verdayîş. Ma Îzmîr de ciwîyenê. Pîyê mi Bolu de yo. Dadîya mi 65 serrî ya. Dadîya mi rayîr nêzana, ziwan nêzana. Zehmetîyan ancena. ATK zî bêveng maneno û vano wa tepişte bimano. Ganî pîyê mi bi lez serbest bêro verdayîş.”