ANQARA - Wekîlanê HEDEPî pare kerd ke ê seba ke Rayberê Şarê Kurdî Abullah Ocalanî bivînê do muracatê Wezîrîya Edaletî bikerê. Hemverfekê HDKyî Cengîz Çîçek wina vat: “Semedê çareserîya problemê kurdî ma wazenê bi birêz Abdullah Ocalanî reyde pêvînayîş bikerê.”

 

Partîya Têdûştîye û Demokrasîyî ya Şaran (HEDEP) Meclîs de derheqê tecrîdê vera Rayberê PKKyî Abdullah Ocalanî de eşkerayîya çapemenîye daye. Wekîlê HEDEPî eşkerayîye de amade bîyî. Eşkerayîye de ame eşkerakerdiş ke semedê bi Abdullah Ocalanî reyde pêvînayîş bêro kerdiş do muracatî bêrê kerdiş. 

 

'Na rewşe hemverê merdimayî yo'

 

Serekwekîlê Grûba HEDEPî Saruhan Oluçî vist vîrî ke Rayberê PKKyî ra xeberêke nêna girewtiş û vat: “Na rewşe kerdişê vera merdimatîye yo û huqûqê zereyî û mîyanneteweyîyî de cayê na rewşe çin o. Dinya de nimûneyê winasî çin ê. Yewin nimûne esto no zî Îmrali yo. Tecrîdo mutleq hem serê Ocalanî hem zî serê her 3 kesê ke kîşte ci de yê.”

 

‘Tecrîdê Îmraliyî skandalê huqûqî yo’

 

Hemvervatoxê HDKyî û Wekîlê HEDEPî yê Stenbolî Cengîz Çîçekî kerdişê Îmraliyî sey “îlegalîya tewr pîle” pênase kerd û vat: “Tecrîdê Îmraliyî skandalê huqûqî yo. Na mesele meseleya rûmetî ya pêro Meclîsî ya. Na bêhuqûqîye teyna vera Birêz Ocalanî nêna kerdiş. Gultane Kişanak, Can Atalay pêro bi hawayêkê bêhuqûqî tepişîyenê.”

 

‘Ganî tecrîdê Îmaraliyî bêro wedaritiş’

 

Cengîzî dewam de wina vat: “Meseleya tewr pîle ya Tirkîya meseleya kurdan a. Heta ke meseleya kurdan çareser nêba bêhuqûqîyî do nêqedê. Nêzdîbîyayîşê bi Birêz Ocalanî nêzdîbîyayîşê bi meseleya kurdan o. 25ê adara 2021î ra nata Birêz Ocalanî ra xeberêke nêna girewtiş. Seba ke meseleya kurdan bi rayîrê demokratîkî bêra çareserkerdiş, ganî tecrîdê Îmraliyî bêro wedaritiş.”

 

‘Ganî her kes vera nê tecrîdî de vejîyo’

 

Cengîzî tewr peyîn dîyar kerd ke ganî her kes vera tecrîdî de vejîyo û wina vat: “Êyê ke xo rê vanê demokrat û merdim ganî vera nê tecrîdî vejîyê. Ma venga dewlete û îdarekaranê ci danê ke wa goreyê qanûnanê xo têbigêrê. Wa birêz Ocalan bieşko pêro heqanê xo bişuxilno. Ma do seba ke Birêz Ocalanî bivînê ewro saete 16.00 de muracatê Wezîrîya Edaletî bikerê. Ma do erkê xo bîyarê ca.”