Oznur Deger

 

MÊRDÎN - Sîyasetmedarê TJAyî derheqê kampanyaya TJAye ke bi sloganê ‘Bi jin jiyan azadî reyde ver bi azadîye’ dîya destpêkerdiş de qisey kerdî û dîyar kerdî ke çarçeweya kampanyaya de tax bi taxe gêrenî û seba azadîya cinîye, seba şikitişê tecrîdî û peynîardişê polîtîkayê şerê taybet têkoşîn kenê. 

 

Têgêrayîşê Cinîyê Azade (TJA) 15ê êlule de bi sloganê ‘Bi jin jiyan azadî reyde ver bi azadîye’ deklerasyonê xo eşkera kerd û dima ra startê kampanyaya xo da. Aktîvîstê TJAye çarçeweya kampanyaye de xebatê atolye, perwerdeyî û rêxistinbîyayîşî rayîra ra berdî û bajar bi bajar bi cinîyan reyde yenê têkiş. 

 

Aktîvîstê TJAye ra hemşaredara Qoserî ke qeyûm tayînê herinda aye ameybî kerdiş Nîlufer Elîk Yilmaz û hemşaredara Dêrikî Mulkîye Esmeze derheqê kampanyaye de ercnayîş kerdî. 

 

‘Tecrîd serê heme şaran de yeno rayîr ra berdiş’ 

 

Nîlufer Elîk Yilmaze da zanayîş ke kampanyaya ke dayî destpêkerdiş do heta 8ê Adare dewam bikera û çarçeweya kampanyaye de no yew aşme yo xebatan rayîr ra benê. Nîlufere da zanayîş ke çarçeweya polîtîkayê şerê taybet, tecrîd û şîdetê serê cinîyan de xebatanê cîya cîyayan rayîr ra benê û bajarê cîyayan ê Kurdistanî de xebatê atolyeyan û konferansê cinîyan pê anê. Nîlufere wina dewam kerd: “Tecrîd tena serê Birêz Ocalanî de nê serê heme şaran de yeno rayîr ra berdiş. Çarçeweya tecrîdî de serê cinî û tutan de polîtîkayê şerê taybet ê cidî yeno rayîr ra berdiş.”

 

‘Bi şerê taybet wazenê cinîyan çinî bikerê’ 

 

Nîlufere tesîrê şerê taybet ê serê cinîyan ercnaye û nê çîyan vat: “Şer mabenê hêzan de yeno kerdiş. La şerê taybet kulturêk şerî yo ke tesîrê xo serê heme şarî de keno. Bi taybetî serê cinîyan de tesîr virazeno. Çarçeweya şerê taybetî de bi raybazê tacîz, destdergê, qirkerdiş û sewbînayan wazenê cinîyan çinî bikerê. Wazenê cinîyan mîyanê komelî de bê îtîbar bikerê. Bedenê cinîye yeno teşhîrkerdiş. Destdergê bi cinîyan yeno kerdiş. Wazenê cinîyan bi nê caardişan bê îtîbar bikerê. La vera nê caardişan de çarçeweya kampanyaya xo de ma atolyeyê perwerdeyî pê ard. Ma hewl danê xo biresnê heme cinîyan. Ganî ma vera tecrîd û polîtîkayê şerî de bibê yew. Ganî ma înan hêrişan bipelçiqnê.” 

 

‘Cinî eleqeyêk gird mojnenê’ 

 

Nîlufere wina qiseykerdişê xo peynî kerd: “Komel eleqeyêk gird nîşanê kampanyaye dano. Ma tax bi taxe gêrenê. Ma bi cinîyan reyde yenê têkişt. Ma xebatê atolyeyî da destpêkerdiş û ma do taxan de rayîr ra berê. Şar na babete de zaf hesas o. Do panelê ma pê bibê. Cinîyî eleqeyêk gird mojnenê. Tecrîd zîndanan ra bigêrêne heta komelî vila bîyo. Heqê tepişteyan yeno xespkerdiş. Poşmanî bi tepişteyan yeno ferzkerdiş. Heqê tepişteyan yeno astengkerdiş. Tecrîd heta keyeyê ma û taxa ma ameyo. Tutanê keyeyê welatperweran ser de polîtîka yeno rayîr ra berdiş. Ma tecrîdî bi kurahî hîs kenê. Ganî ma vera înan de têkoşîn bikerê.”

 

Do bi cinîyê ke zeytûnan kom kenê reyde bêrê têhet 

 

Mulkîye Esmez zî dîyar kerd ke aşmêke verê startê kampanyaye dayê û çarçewaya nê de bername ameyê vetiş, kuçe bi kuçe gêrenê û xebatan kenê. Mulkîye wina vat: “Ma hewl danê ke xo biresnê heme cinîyan û xeta azadî û cuye de bîyarê têhet. Xebatê atolyeye pê yenê. Na atolye serê hîn sernameyê yenê rayraberdiş. Ma hewl danê cinîyan tewrê nê atolyeyan bikerê. Ma wazenê pîya têkoşîn bikerê. Karê mewsîmî dest pêkeno. Cinî karê mewsîmî de xebityenê. Ma do derheqê rewşa cinîyê karkerê mewsîmî de agahî bigîrê. Ma zo munaqaşe bikerê û problem çareser bikerê. Serê nê de planê ma estê. Dêrik de mewsîmê arêdayîşê zeytunan. Nê het ra ma do cinîyan zîyaret bikerê.” 

 

‘Ma semedê azadîya cinîyan hewl danê’ 

 

Mulkîye wina vat: “Kampanya do hetê 8ê Adare dewam bikero. Vernî de weçînayîşê estê. Ma do hewl bidê ke cinîyan tewrê xebatan bikerê. Ma do cinîyê ciwanan rêxistin bikerê û tewrê xebatan bikerê. Ma semedê azadîya cinî hewl danê. Ma muhîmî danê nê. Ma xo çiqas biresnê çiqas cinîyan hendd baş o. Xebatê ma zêdeyêr derheqê tecrîd û şerê taybetî de yenê rayîr ra berdiş.”