Marta Somek

 

STENBOL - Sîyasetmedara kurde Gultan Kişanake 7 serrî yo zîndan de ya û semedo ke vera şîdetê camêrdî de vengê xo berz kerd û têkoşînê cinîye gird kerd, nêameye tehlîyekerdiş. Embazê Gultane dîyar kerdî ke ver bi 25ê Teşrîna Peyêne ra ganî heme cinîyî vengê xo berz bikerê û paştîdayîş bimojnê. 

 

Dewaya Kobanê ke Hemsekerê Pêroyî yê Partîya Demokratîke ya Şaran (HDP) yê verêne û hemşaredara bajarê girdî a Amedî ya verêne Gultan Kişanake zî mîyan de 18 kes ci ra tepişte pêro pîya 108 siyasetmedarê kurd bi bahaneyê hedîseyê 6-8ê Teşrîna Verêne ya 2014î yenê muhakemekerdiş, dewam keno. Gultan Kişanake vera prosesê tepiştişî yê 7 serran ê azamî ke Qanûnê Mehkemaya Ceza (CMK) de yeno vatiş, serbest nîna verdayîş. 29ê teşrîna verêne de Merkezê Xebatê Hunerî yê Beyogluyî eşkerayî da û venga DDMyî kerd ke bi lez qerarê tedbîrî pê bîyaro. Embazê sîyasetmedara Kurd Gultan Kişanake dîyar kerdî ke ver bi 25ê Teşrîna Peyêne ra ganî heme cinî vengê xo berz bikerê û paştîdayîş bimojnê.

 

‘Ganî biameyêne tehlîyekerdiş...’ 

 

Kaybaze Denîz Turkalîye dîyar kerd ke Gultane bi hawayêkê bêhuqûqî ameya tepiştiş û wina vat: “Gultane 7 serrî yo tepişte ya û no xora merdiman hêrs keno. Dimayê 7 serran ganî biameyêne serbestverdayîş. La no pê nêame û no vera qanûnan o. No welato weş de çîyê winasî canê merdiman dejnenê û merdiman hêrs keno. Bi raştî her çî mojneno ke ma na dinya de bêheqan ciwîyenê.” 

 

Venga paştîdayîşî 

 

Denîze ard ziwan ke Gultane embaze, doste û hemraya aye ya û wina vat: “Gultan Kişanake yew serkêşa têgêrayîşê cinîyan ra ya. Yew morê siyasetê kurdî ya. Ez venga heme cinîyan kena. Ganî Gultane bi lez serbest bêra verdayîş. Ez venga heme cinîyan, dostê xo, wayê xo kena ke bi Gultane reyde bikewê mîyanê paştîdayîşî.” 

 

'Seba ke vera şîdetî de vengê xo berz kerd ameye tepiştiş’ 

 

Femînîsta xosere Hulya Gulbahare zî da zanayîş ke Gultan Kişanake serranê xo daya têkoşînê şarê kurdî û wina vat: “Gultane sey temsîlkara şarê kurdî parlementoye de zî cayê xo girewtêne. Eynî wext de Gultane temsîlkarîya cinîye de têkoşînêk gird rayîr ra berd û kesêk bi ercaye ya. Vera nê çîyan prosesê tepiştişê aye hema zî dewam keno û tepiştişê aye parçeyêk polîtîkayê hêrişî yê dewlete yo. Gultane hemserekatî û xebatê xo vera ameye tepiştiş. Coka ra zî semedo ke vera şîdetî de vengê xo berz kerd, ameye tepiştiş. Ganî ma tena seba Gultane nê, nimune Sebahat Tuncele zî 7 serrê xo dekerd. Sebahat û heme embazê bînî yê tepişte têkoşînê cinîye vera, têkoşînê femînîstîye vera ameyî tepiştiş. Ganî ma vera tepiştişan de îtîraz bikerê. Ver bi 25ê Teşrîna Peyêne ra ganî paştîdayîş bêro girdkerdiş.”