Melîke Aydin

 

ÎZMÎR - Îzmîr de çarçeweya kampanyaya TJAye de atolyeya xoser, têmîyan pê ame û bi no hawa yeno hedefgirewtiş ke îradeyê cinî yê rêxistinkerde bivejîyo raşte. Endama Muhendîsê Azadîwaştoxî Utku Tutara ke tewrê atolyeye bî vat: “Ganî ma sey zîhnîyetê camêrdîye nêfikirîyê û tewirê fikrê camêrdîye nêvejê raşte. Ganî ma tewrê xebatan û atolyeya jineolojîye bibê.” 

 

Tevgerê Cinîyê Azade (TJA) bi sloganê ‘Bi cinî cuye azadî reyde ver bi azadîye’ kampanya da dest pêkerdiş û do heta 8ê Adara 2014î kampanya dewam bikera. Payê kampanyaye ya Îzmîrî 28-29ê teşrîna verêne de ame eştiş.

 

Atolyeya ke roja ewil pê ame de ‘tecrîd û polîtîkayê şer’, ‘cînsîyetperestî û zîhnîyetê cînsîyetî’ ame munaqaşakerdiş. Roja diyîne ya atolyeya têmîyan de ‘camêrdîye’ ame qiseykerdiş. 

 

Aktîvîsta TJAye û rayîrbera Partîya Têduştî û Demokrasîyî ya Şaran (HEDEP) Funda Akbulute derheqê atolyeyan de qisey kerd.

 

‘Vera polîtîkayê şerî de ganî têkoşîn bêro dayîş’ 

 

Fundaye da zanayîş ke Rojhelatê Mîyanenî de şer, Kurdistan û metropolan de qirkerdişê cinîyan dewam keno, 6ê Sibate de zî erdlerz pê ame û vat: “Birînê erdlerzî hema nêameyî piştiş. Çimeyê heme probleman tecrîd o. Serê Birêz Ocalanî de tecrîdêk giran babeta vatişî ya. Polîtîkayê tecrîdî tesîr serê heme hetê komelî de kerdo. Cinî hepsê keyeyî yenê kerdiş. Cinî siyaset ra yena dûrîfînayîş. Nê heme girêdayeyê tecrîdî yê. Atolyeyan de polîtîkayê şerî ame qiseykerdiş. Ma nê caardişê ke heta nika ameyî rayîr ra berdiş vînenê. Cinîyan, ciwanan ver bi antişê tîryakî ra beno. Fuhuş serê cinîyan de yeno ferzkerdiş. Ma bi kampanyaya xo hedef kenê ke cinîya ke wayîrê îrade û wayîrê fehmî vejîyena aver berê. Ganî ma vera polîtîkayê şerî de têkoşîn bikerê.” 

 

‘Camêrdîye û cînsîyetperestî ame qiseykerdiş’

 

Fundaye wina qiseykerdişê xo peynî kerd: “Çarçeweya kampanyaye de ma do atolyeyan her ca de rayîr ra berê. Ma atolyeyê têmîyan zî pê ard. Ma serê babeta camêrdîye û cînsîyetperestîye de qisey kerd. Ma her çend ke vajê ma camêrdîye kişto zî hema no pê nêameyo. Coka ra zî ma nê perwerdeyî muhîm vînenê. Ma kêmasîyanê xo çareser kenê. Xebatê ma do heta 8ê Adare dewam bikero. Ganî seba tewirê têkoşînî ma xo hadre bikerê. Ganî ma xebatê xo her ca de rayîr ra berê.”

 

‘Seba hemcuya azade ganî camêrdîye bêro kiştiş’

 

Endama Muhendîsê Azadîwaştoxî Utku Tutara ke tewrê atolye bî da zanayîş ke ganî camêrd zî serê azadîya cinîye de bifikirê û vat: “Seba hemcuya azade pê bêra ganî camêrd zî camêrdîye bikişo û cinî xo aver biba. Kiştişê camêrdîye rayîrvanîyêk o. Seba ke ma sey zîhnîyetê camêrdî nêfikirî ganî ma tewrê xebat û atolyeyan bibê. Ganî ma bivejê teberê fikrê camêrdî. Do azadîya cinîye û hemcuya azade wina pê bêrê. Coka ra ganî ma tewrê atolyeyan bibê.” 

 

Hemserekê HEDEPî yê Karabaglarî Îsmaîl Başciyî zî ard ziwan ke çîyê ke atolyeyan de ameyî musnayîş ganî bikewê cuye mîyan û vat: “Perspektîfê mi tîya ra girêdayeyo. Ez do cuya xo de pê bîyara. No eşteyê 5 hezar serrî yo. Problemê nasnameyê neteweyî yê cinîyê kurd û sinife esto. Di reyan komel de yenê pelçiqnayîş. Ma na bawerîye de yî ke do bi xeta Zîlan û Bêrîtanan bêra çareserkerdiş. Ma do têkoşînê nê çîyî bidê.” 

 

Endama HEDEPî Husnîye Dage zî dîyar kerd ke camêrd bi atolyeyê têmîyan zêde aver nêkewto û vat perwerde ameyî dayîş, malumatê înan rê malumat zêde kerd û vat ke kişta yewbînan de mendiş xeylê ercin o. Husnîyeye sewbîna vat ke ço bikewo serê milê înan do bikerê û va ke sey cinîye hêvî xo de vînena û seba girdbîyayîşê hêvîye do têkoşîn bikera.”