ANQARA - Sîyasetmedare Nursel Aydogane derheqê 1ê Teşrîna Peyêne Roja Kobanê ya Dinya de da zanayîş ke AKP serkewtişê Kobanê qet nêqurtna, ewro Kobanê reyna binê tehdîdî de yo û ganî no paştîdayîş bi lez bêro xurtkerdiş.

 

Bi şorişê Rojawanî yo ke 19ê Temmuza 202yî de pê ame, şarê Bakur û Rojhelatê Sûrîye cuyêka newe awan kerd. Bi serkêşîya cinîyê kurdî, cinîyê Bakur û Rojhelatê Sûrîye her raşte de cayê xo girewt û heqanê xo pawit. Vera DAÎŞî de têkoşînêk gird ame dayîş. Nê nimuneyê têkoşînî yê vera DAÎŞî ra yew zî Kobanê bî. 

 

Coka ra 1ê Teşrîna Peyêne ya 2014î de qerar ame dayîş ke 1ê Teşrîna Peyêne sey Roja Kobanê ya Dinya bêra îlankerdiş. Sîyasetmedare Nursel Aydogane derheqê 1ê Teşrîna Peyêne Roja Kobanê ya Dinya de ercnayîş kerd. 

 

'Waştî şorişê azadîye çinî bikerê’ 

 

Nursele 1ê Teşrîna Peyêne Roja Kobanê ya Dinya pîroz kerd û wina vat: “Xelisnayîşê Kobanê asan nêbî. Xeylê bedelî ameyî dayîş. Dima ra azad bî. Kobanê de fedakarî û vindertişêk bi qerardar estbî. Coka ra ame xelisnayîş. Ma serra 2014î de Amed de bî û hêrişê DAÎŞî wexto ke dest pêkerd ma derbazê Pirsûsî bîyî. Ma bîyî şahidê azadîya Kobanê û ma bîyî şahidê nê prosesî. Êlulê 2014î de hêrişê DAÎŞî yê vera Kobanê dest pêkerd û no hêriş îqtîdarê AKP-MHPyî ra cîya nêbî.19ê Temmuza 2012yî de şorişê azadîya Rojawanî ame îlankerdiş. Dimayê di serran no şorişê azadîye destpêkerdiş de Kobanê de kewt dewre. Çike dimayê şorişê azadîya Kobanê sey kantonê yewine ame îlankerdiş. Coka ra zî hêrişê DAÎŞî yê serê Kobanê tesaduf nêbî. Waştî ke şorişê azadîye çinî bikerê. Hem zî waştî ke bidestfînayîşê Kobanê reyde cayê bînan zî bi asanî bifînê. Coka ra zî DAÎŞ hêrişê Kobanê kerd.”

 

'Waştişê merdimîye hetê AKPyî ra nêameyî qebulkerdiş' 

 

Nursele ard ziwan ke DAIŞ rêxistinêke tewr hove yê dinya yo û wina dewam kerd: “Vera DAÎŞî de serewedarnayîşêk gird estbî. Dimayê hêrişan Kobanê ame vengkerdiş, nizdîyê 50 hezar merdim kes koçê sînorê Pirsûsî bîyî. Zaf merdim zerre de nêmendbî. Kulmêk şarê sîvîl yo ke bi sorişî reyde vera DAÎŞî de şar bikerdêne estbî. Dimayê hêrişan tay dewî hetê DAÎŞî ra ameyî destfînayîş. Ma û Rojawan binê tehlukeyêk gird de bî. Ma o wext AKPyî ra vat ke wa korîdorê merdimîye abibo û hetkarîya merdimîye şêra uca. La no bi ca nêame û vera nê caardişan de çalakî dest pêkerdî. 6-8ê Teşrîna Verêne de çalakî vila bî. O wext Tayyip Erdogan Dîlok de vat 'Kobanê ha kewt ha kewt'. No vatiş seba kurdan û dostê înan vatişê peynî bî.”

 

‘AKPyî vînîkerdişê xo yê Kobanê tu wext nêmehna'  

 

Nûrsele dîyar kerd ke dimayê Tayyip Erdoganî ê vatişî kerd coka zî HDPyî semedê Kobanê venga çalakîyan kerd û wina vat: "Şarê kurdî û dostê şarê kurdî her cayê dinya de semedê Kobanê vejîyayî raşteyan. Tîya de prosesê azadkerdişê Kobanê dest pêkerd. Bi paştdayîşê hêzê koalisyonî zî Kobanê azad bî. No bi destpêkê vînîkerdişê DAÎŞî yê Rojawanî. Bi têkoşînê QSDyî reyde zî DAÎŞî vînî kerd. O wext tehluke çiqas pîl bi, nika zî pîl o. Nika zî Serekkkomar Tayyip Erdogan her firsendî de vano ma do hêrişê Rojawanî bikerê. Semedê Kobanê tehlukeyêk pîl esto. Bi munasebetê 1ê Teşrîna Peyêne Roja Kobanê ya Dinya ganî ma nê pers bikerê çira wazenê Kobanê bigîrê? AKP û MHPyî semedê paştdayîş dayî DAÎŞî coka zî vinîkerdişê DAÎŞî seke vînîkerdişê xo vînenê. AKPyî vînîkerdişê xo yê Kobanê tu wext nêmehna.”

 

'Ganî polîtîkayê AKPyî bêrê tehşîrkerdiş' 

 

Nûrsele dîyar kerd ke 1ê Teşrîna Verêne Roja Kobanê ya Dinya roja paştdayîşê şaran o û wina vat: "Paştdayîşî şarê dinya yê semedê Kobanê qels bîyo, ewro Kobanê reyna binê tehdîdêk pîl de ya û ganî no paştdayîş lezabez bêro xurtkerdiş. Erdogan semedê Filistinî mîtingan virazneno. Labelê hêrişê Rojawanî keno. Ganî merdim nê çî teşhîr bikero. Kobanê merdimî semedê azadîye xo ver danê estê coka ganî paştdayîşê bi Kobanê reyde bi hêzêr bibo. Ganî polîtîkayê AKPyî bêrê tehşîrkerdiş. Ganî paştdayîşêk hempar dinya de bibo. QSD ra nêbo dinya bi DAÎŞî nêeşkena."