MÊRSÎN - Tepişteyê Zîndanê Tarsûsî dîyar kerdî ke gardîyanan qiseykerdişê kurdkî înan rê qedexe kerdî. 

 

Parlamentera Mersînî ya HEDEPî Perîhan Kocaye ajansê ANFyî rê qisey kerd û dîyar kerd ke Zîndanê Tarsûsî de merheleyêk giran de yo û heqê merdiman yeno binpaykerdiş. 

 

Perîhana ke şî zîyaretê tepişteyan ANFyî rê qisey kerd. Perîhane dîyar kerd ke zîndanan de her roje şert û mercî hîna giran benê, muracatê tepişteyan yenê peygoşkerdiş û wina vat: “Tepişteyê Zîndanê Tarsûsî binpaykerdişê heqê merdiman tesdîq kerdî. No donemo ke destûrê bingeyîn ameyo qedexekerdiş de heqê merdiman ê tewr esasî çinî yenê hesibnayîş, problemê zîndanan zêde benê. Zîndanan de îşkence û caardişê xirab bi sîstematîk dewam kenê.”

 

Cehdkerdişê înan bênetîce mend 

 

Perîhane bale ant serê problemê pakî, weşî, werd û awa germî ê Zîndanê Tarsûsî û vat: “Tepişteyî bi taybetî yê sîyasî wexto ke vera nê caardişan de vejîyenê, personelê zîndanî heqaretê înan kenê, şîdetê fîzîkî bi înan yeno kerdiş û cezaya dîsîplînî bi şeklêk kêfî înan rê yena birnayîş. Tepişteyî dîyar kerdî ke derheqê babete de waştî ke mudirî reyde pêvînayîş pê bîyarê la cehdkerdişê înan bênetîce mendo.”

 

Qiseykerdişê kurdkî qedexe kerdî 

 

Parlamentera Mersînî ya HEDEPî Perîhan Kocaye bale ant tedaya serê tepişteyanê kurdan ê ke nasnameyê kurdîtî vera tepişteyê ser û vat: “Hewteyê peyêne gardîyano bi nameyê Eren qiseykerdişê kurdkî tepişteyan rê qedexe kerdo. Tepişteyan dîyar kerd ke wexto ke mabenê xo de kurdkî qisey kerdî, înan rê vato ‘zîndan de qiseykerdişê kurdkî qedexe yo’ û cezaya dîsîplînî tepişteyan rê ameya birnayîş. Sewbîna zî cezaya hucreye ya yew roje tepişteyê siyasî rê ameya birnayîş.”