AMED - Hemsereka DBPyî ya Amedî Sûltan Yaraya ke yew îmzakerdoxa deklerasyonê ‘Nika ra ver bi ameyoxî ra venga azadîye’ ra ya vat: “Tena Kurd nê, heme şarî êdî vînenê ke bê fikrê Ocalanî çareserî mumkun nîyo.” 

 

Bi rêxistinê komelê sivîl, komele û partîyê siyasî deklerasyonê ‘Nika ra ver bi ameyoxî ra venga azadîye’ Amed de ame eşkerakerdiş. Deklerasyon seba çareserkerdişê problemê kurdî yê demokratîk, aştî û wedaritişê tecrîdo girankerde ke serê Abdullah Ocalanî de yeno rayîr ra berdiş, ame eşkerakerdiş. Hemsereka Partîya Herêmê Demokratîke (DBP) Sultan Yaraya ke yew îmzakerdoxê deklerasyonî ra ya dîyar kerd ke dezgehê îmza eştî deklerasyon do proses taqîp bikerê. 

 

‘Deklerasyon xeylê muhîm o’ 

 

Sultan Yaraye destpêkerdişê qiseykerdişê xo de dîyar kerd ke deklerasyon seba aştîyêk daîmî û wedaritişê tecrîdê serê rayberê PKKyî Abdullah Ocalanî muhîm o. Sultane ard ziwan ke ewro Rojhelatê Mîyanenî xitimîyayo û wina vat: “Lazimî bi fikirê birêz Ocalanî esto. Tena kurdî nê, dinya vînena ke bê fikrê birêz Ocalanî çareserî nîno. Bi taybetî zî kurdî ganî Rojhelatê Mîyanenî de benê wayîrê rol û mîsyon. Nika ma ewnîyenê ke no 25 serrî yo tecrîdêk giran serê birêz Ocalanî de yeno rayîr ra berdiş, di serr û nîme yo ke pêvînayîş ameyo birnayîş. Sey her tepişteyî heqê ci esto ke bi keye û avûkatanê xo reyde pêvînayîş bikero. La heqo ke tepişteyanê bînan rê yeno dayîş seba birêz Ocalanî nîno dayîş û kurdî zî bi raştî êdî nê çîyî qebul nêkenê. Çike wedaritişê problemê kurdî, wedaritişê tecrîdî de yo.”

 

‘Tesîrê tecrîdî çar hetê Kurdistanî de esto’ 

 

Sultane da zanayîş ke hêrişê ke Mexmur û Kurdistanî yenê kerdiş bi tecrîdî reyde girêdayeyê. Sultane ard ziwan ke rojavayê Kurdistanî ke dewtkewtişê tewr muhîm ê kurdan o de nika îşxalkerî wazenê destê kurdan bigîrê û wina dewam kerd: “No zî reyna bi tecrîdî reyde girêdaye yo. Tesîrê tecrîdî çar hetê Kurdistanî de esto. Tena serê Bakurî de nê. Heta ke no tecrîd nêwirzo hem Kurdistan û hem zî Rojhelatê Mîyanenî de aştîyêk daîmî pê nîna û teda û zordestîyê serdestan nêqedîyo û do her tim zî dewam bikero. Coka ra zî hîna zêde lazimî bi fikrê Ocalanî esto û ganî bi lez ci reyde pêvînayîş bêro kerdiş. Kurdî bi xo ganî wayîrê ci bivejê. Elbet paştîdayîşê raşteyê mîyanneteweyî zî xeylê muhîm o. La ganî kurdî, bi taybetî zî cinî vera nê tecrîdî de mîyanê xoverdayîşî de bê.”

 

‘Fikrê birêz Ocalanî dinya de vila bîyo’ 

 

Sultane dewamê qiseykerdişê xo de ard ziwaan ke kapîtalîzm êdî xitimîyayo û da zanayîş ke her ke şino beno sebebê pêkewtiş û krîzê ekonomî û nêweşîyan. Sultane bale ant serê tesîrê şer û kapîtalîzmî ke serê ekolojîye de zî xo dano mojnayîş û nimuneyê germbîyayîşê hewayî da û dîyar kerd ke bombardumankerdiş, egzozo ke yeno vilakerdiş benê sebebê germbîyayîşê zêde. Sultane wina vat: “Paradîgmaya birêz Ocalanî de heqê ekolojîye esto û pawitişê xozaye esto. Eke dinya goş bidayîne talankerdişê xozaye do nika xoza hende talan nêbayêne û Rojhelatê Mîyanenî de zî do şer gur nêbayêne. Coka ra zî dinya fehm kerda ke rêxistina Ocalanî tena seba kurdan û azadîya şarê kurdî nê, seba azadîya xoza, cinîyan û seba şerê dinya peynî bibî ya. Vera hende tepiştiş, teda û zordestîyan zî serdestan nêeşka vernîya vilakerdişê fikrê birêz Ocalanî bigîrê. La seba ke no fikr hîna zêde vila bibo lazimo ke Ocalan bi hawayêkê fîzîkî mîyanê şarî de bo.”

 

'Ma do çalakîyan dewam bikerê’ 

 

Sultane qiseykerdişê xo yê peyênan de dîyar kerd ke nika ra tepîya dezgehê ke îmze eştî deklerasyonî do ameyox taqîp bikerê, her raşteyî de vila bibê û planê xo virazê. Sultane da zanayîş ke heta ke ser bikewê û biserê amacê xo do çalakîyan dewam bikerê.