ŞIRNEX - Bi wesîleya serrgêra tayînkerdişê qeyûmî Şaredarîya Cizîre de çalakî ameye organîzekerdiş û tayînkerdişê qeyûmî binê ablûqayê polîsan de ame şermezarkerdiş. Parlamenterê HEDEPyî Zekî Îrmez tayînkerdişê qeyûmî seke “xespkerdişê îradeyî” name kerd û vat ke ê qeyûmî nas nêkenê. 

 

Rêxistina HDPyî ya Şirnexî bi wesîleya tayînkerdişê qeyûman ê Şaredarîya Cizîre verê banê partîye de eşkerayîye daye. Wekîlê HEDEPî yê Şirnexî Zekî Irmez û hemşaredarî Mehmet Zirix û Bêrîvane Kutlu yê ke wezîfeyê înan ame xespkerdene, û xeylêk kesî tewrê eşkerayîye bîyî. 

 

Polîsan saetanê serê sibayî de rayîrê ke şinê banê partîye girewtî binê ablûqa û grûba ke waşt banê partîye ra vejîyo teber bi barîyerî verê ci girewt. Astengkerdişê polîsan bi pirodayîşê mertal û beran ame protestokerdene. 

 

Parlamenterê HEDEPî Zekî Irmezî bale ante seserra komare ser û vat: “Komare serê xespkerdişê heqanê kurdan ser ameye ronayene. Serranê 2016 û 2019 de şaredarîyan de qeyûm ame cakerdene û ma qeyûman nas nêkenê.”

 

'Qeyûm nîşanê bêçareyîya AKPyî yo'

 

Hemşaredara Cizîre Bêrîvane Kutlu zî vat: “Qeyûm sey bêçareyîya AKPyî yo.” Bêrîvane, dîyar kerd ke çîyê ke AKP nêeşkeno bi rayîrê sîyasetî bi dest bikero, hewl dano bi rayîrê qeyûman desteser bikero û bêhuqûqî dewam keno. 

 

Na mabêne de girse zî xeylêk rey sloganê, “Ma do bi xoverdayîş serbikewê” û “Zextî nêeşkenê zorê ma berê” berz kerdî.