Melîke Aydin

 

HATAY - Dimayê erdlerzî netîceyê hewldayîşê Paştîdayîşê Cinîyan ê Kirkyamayî bi sloganê ‘ma do bi beraradişî bibê’ atolye ame awankerdiş û cinîyê uca nêweşî û deştişî musayî, dest bi berardiş û girewtişê sîparîşan kerdî. Cinî uca de bi paştîdayîş, piştişê birînanê xo û berardişî benê nimune.

 

Paştîdayîşê Cinîyan ê Kirkyamayî serra 2018î de Hatay de ame awankerdiş û dimayê erdlerzî bi sloganê ‘Ma bi berardişî estê’ atolyeya neqşî û deştişî da destpêkerdiş. Cinî atolye de dest bi girewtişê sîparîşan zî kerdî. 15 kesî ra zêde cinîyê ke atolye de ameyî têhet û hem birînê erdlerzî yê yewînan pişnenê û hem zî keda cinîye ya xeyme û konteyniran vejenê raşte. Cinîyan dîyar kerdî ke seba atolye gird bibo û açarîyo qezencî lazimî bi hîna zêde paştîdayîşî esta û vatî ke problemê tewr gird weyebîyayîş o. 

 

‘Êdî sîparîşan gênê’ 

 

Organîztora projeyî mamosteya ke ameya îxrackerdiş Gulîzar Işik Çaye dîyar kerd ke dimayê erdlerzî bi amancê paştîdayîşê cinîyan dest bi xebatêke winasî kerdî û vat ke paştîdayîş dimayê ke mamostayê zerrîwazî yê Stenbolî ameyî perwerdekerdiş dest pêkerdo û wina dewam kerd: “Xebata ma bi deştişê kincan dest pêkerd û nika ma sîparîşan gênê. Serê înternetî ra ma sîparîş gênê. Ma kesê ke rewşa înan başa ra paştîdayîş gênê. La pawitişê ma no yo ke teberê bajarî ra bêro. Kumaş nika bi kampanyayan yeno temînkerdiş. Stenbol ra Zuleyha Butîk paştîdayîş dana. Sere de bi kampanyaye çend makîna ameyî û dima ra ma proje kerd dewre. Makînayê ke ma xirban mîyan ra vetî û tamîr kerdî zî estê.”

 

‘Problemê tewr gird weyebîyayîş o’ 

 

Gulîzare dîyar kerd ke seba berardiş dewam bikero çi destê îna ra yeno do bikerê û vat ke cinî tîya de hem berardiş kena û hem zî karê keyeyî, hem zî keye ra tay dûrî kewena. Gulîzare wina dewam kerd: “No hem înan zî hem zî ma rê kêfweşîyêk o. projeyê ma yê bîn zî estê. Eke ma paştîdayîş bigêrî ma do gird bikerê. Ma wazenê her kes bêro tîya û perwerde bigîro. Ma di cayan yewbînan ra cîya kerd. Yew berardişî ke newe musenê û ma wazenê tîya de bigîrê. Ganî her cinîyêk bimusa. Wazena sey hovî, wazena sey meslekî. Nika 7-8 cinî berardiş kenê û bi temamî 15 cinî estê. Şertan vera bi taybetî kesê ke mekteb wanenê nêeşkenê bêrê. Problemê tewr gird weyebîyayîş o. Sloganê ma ‘ma bi berardişî estê’.”

 

‘Ma do hîna zêdeyêr pîl bibê’ 

 

Gulhan Îflazoglu ke vernîya erdlerzî keyeyê xo de terzîtîye kerdêne, dimayê erdlerzî bi hemkarîya embazanê xo nê cayî kifş kerda û wina vat: “Mi sey zerrîwaz dest pêkerd. Ma sey cinî waşt ke nê karî dewam bikerê. Me erdlerzêk derbaz kerd. Keyeyê ma rijyayî. Lazimîyê ma bi panc quruşî estbî. Ma ewil paştdayîş da nika ma do gird bikerê.”

 

‘Ez ameya ke birînanê xo bikewînî’ 

 

Cinîya bi nameyê Leyla Kurk ke yew kursîyer a da zanayîş ke hîrê tutanê xo erdlerz de vînî kerda û wina vat: “Ez ameya ke birînanê xo bikewînî. Semedê mi zaf baş o. Ez ameya ke hîn çîyan bikera. Ma xeyman de manenê. Keyeyê mi şi. Ma kuçe de mendî.”

 

‘Wa pêro cinî bêrê tîya’ 

 

Cinîya bi nameyê Sîbel Kirik zî dîyar kerd ke hem semedê hobî yo, hem zî semedê tesîrê psîkolojîkî yê erdlerzî kêmî bikero ameya tîya û wina ard ziwan: "Ez kevanî ya. Hîn zanayîşê mi estbî. Mi waşt ez dewam bikera. Qet nêbo ma hîn xo laver berê. Ma keye ra hîn  dûr kewenê. Wa cinî bêrê. Ma birînanê xo kewênenê. Xeylêk vînîbîyayê ma virazîyayî. Ma bi hewldayîşê xo serê lingan de manenê.”

 

Munîre Akdenîza ke terzîtîye kena dîyar kerd erdlerz de keyeyê xo vînî kerda û semedê nê barê Serînyolî kerda û vat: “Ez her tim nêeşkena bêra. Otobus zêde nînê. Semedê nê ez bi otostopî yena. No wextê mi bigîro zî ez wazena bêrî uca. Tîya de embazîyê ma virazîyayî. Ma xeylêk zehmetîyan ancenê. La ma yenê tîya tay rehet benê.”