COLEMÊRG - Gever de 6ê teşrîna verêne de Bariş Ozçuko 16 serrî bi îşkenceyî amebi destbendkerdiş û 4 rojan nezaret de mendbi û dima ra amebi tepiştiş. Dadîya ci Salîya Ozçuke dîyar kerd ke lajê aye şenik o, wa lajê aye serbest bêro verdayîş. 

 

Qezaya Geverî ya Colemêrgî de serê sibayê 6ê teşrîna verêne de sereştişê keyeyan de tuto bi nameyê Bariş Ozçukî yê 16 serrî ame destbendkerdiş û dimayê 4 rojan ame tepiştiş. Sereştişê keyeyan de dadî û pîyê ci zî ameybî îşkencekerdiş. Barişo ke bi îdîayê ‘endamtîya rêxistine’, ‘propagandaya rêxistine’ ra ame tepiştiş şirawîya zîndanê tutan ê Amedî. 

 

Dadîya Barişî, Salîya Ozçuke dîyar ked ke sereştişê keyeyî de cereyanê keye ameybî birnayîş û berê keyeyî bi funye ameybî teqnayîş. Salîyaye ard ziwan ke lajê aye şenik o û ganî bi lez serbest bêro verdayîş. 

 

 Polîs şîdet bi keyeyî kerd 

 

Salîyaye da zanayîş ke saetê serê sibayî de bi vengê şikitişê berî hewn ra veriştî û dima ra cereyan ameyo birnayîş. Salîyaye ard ziwan ke polîs hema raşte raşt şîyî odeya ke lajê aye tede rakewtebî û dest bi îşkenceyî kerdî. Salîyaye wina vat: “Ma kerdî odayêk û vengê lajê mi ameyêne. La nêverdayî ma şêrê. Mêrdeyê mi werişt şî ke lajê mi bixelesno. La îşkence bi ci zî kerdî. Ez werişta ke şêra la derbêk dayî sîneyê mi ro. Îşkence bi lajê mi kerdêne la ma nêeşkayî şêrê zerre. Wa no zilm bi kesî nêro kerdiş.”

 

 ‘Bi hawayêkê zit bi saetan îşkence ci kerdî’ 

 

Salîyaye dîyar kerd ke bi saetan îşkence bi lajê aye ame kerdiş û wina dewam kerd: “Sere de zit kerdî û kuyayî. Bi na rewşe ardî salon û polîsê ke ameyêne şîyêne bi payan ci kuyayêne. Nêzana bedenê ci bi çi birnabî la her cayê ci mîyanê gonî de mendbî. Dima ra lajê mi xora şî û berdî banyo û binê awa cemednaye de verdayî. Lajê mi 16 serrî ra şeniktêr o. la îşkence kerdî. Qey kes nê îşkenceyî rê vengê xo nêkeno.”

 

 ‘Polîs sey DAIŞî bî’ 

 

Salîyaye dîyar kerd ke prosesê destbendkerdişî de lajê mi û kesê verê ci nêvetî lavabo û werd nêdayî înan. Salîyaye wina qiseykerdişê xo peynî kerd: “Lajê mi 16 serrî yo. Vera nê emrî nêverdayî ma nezaret de bivînê û telefon bikerê. Ma se bi dewlete kerd. Dewlete îşkence bi tutanê ma kena. Tu sucê lajê mi çin o. Polîsê ke ameyî keyeyê ma sey DAIŞî bî. Wa Homa nê zilmî qebul nêkero. Ez wazenê lajê mi serbest bêro verdayîş. Lajê mi şenik o. ez venda avûkat û parlamenteran kena. Wa paştîdayîş bidê ma û lajê mi hema 16 serrî yo.”