Nazlican Nûjîn Yildiz

 

ÎZMÎR - Bi krîzê ekonomîye reyde problemê starbîyayîşî yê wendekaran zî dewam keno. Wendekara unîversîteye Fadîme Ozdemîre dîyar kerd ke wendekarî mecburî yurdê tarîkat-cemaetan de bi ca benê û vera nê de rêxistinbîyayîşê wendekaran muhîm o. 

 

Problemê wendekarê unîversîteye dewam kenê. Kêmbîyayîşê yurdê KYKyî vera wendekarî nêeşkenê bi ca bibê û yurdê bi pere de ca benê. Krîzê ekonomîye vera vayeya keyeyan zî xeylê zêde bîya. Wendekarî yurdan de bi ca nêbenê û mecburî keyeyê bi kîra de yan zî yurdê tarîkat-cemaetî de manenê. Wendekara unîversîteye Fadîme Ozdemîre dîyar kerd ke îqtîdar problemê starbîyayîşî yê wendekaran çareser nêkeno û ganî vera nê probleman de wendekarî xo rêxistin bikerê.

 

‘Îqtîdar çareserî pê nêano’ 

 

Fadîmeye sinifê 4ine yê Unîversîteya Egeye de beşê Têkilîya Mîyanneteweyî wanena. Fadîmeye bale ant serê krîzê starbîyayîşî yê wendekaran û vat ke na rewşe girêdayeyê krîzê ekonomîye ya welatî ya û wina vat: “Çend alternatîfê wendekaran estê. Yew yurdê KYKyo. La no zî bi sînor o. Yurdê newe nêakenê. Livînê odeyê yurdan ê KYKyî zêdînenê. Xora şîyayîşê KYKyî zî wina asan nîyo. Xeylê wendekarî muracat kenê. No demêk wendekarî xo rê rayîrêk vînenê. 5-6 kesî eynî keye de manenê. Xo rê kenê yurd.”

 

‘Wendekar şinê yurdê tarîkat-cemaetan’ 

 

Fadîmeye da zanayîş ke na rewşe bê çareserî nîya û wina dewam kerd: “Xeylê awanîyê veng yê aîdê dewlete û sewbîna erazîyê veng yê aîdê dewlete ke eşkena yurdan tede viraza estê. La çi heyfo ke wina nêkena. Faturaya krîzî wendekaran rê birnena. Wendekaran bê îmkan verdena. Na nuqtaye de zî muracatê yurdê tarîkat-cemaetan kenê. La teda nê cana her kes zano. Nimune Enes Karayo ke yurdê tarîkat-cematî de mendêne çend serrî verê cû întîxar kerd. Her kes tedaya nê cayan baş zano.”

 

‘Wendekar bi gerreyin ê’ 

 

Fadîmeye qiseykerdişê xo yê peyênan de ard ziwan ke unîversîteyan de xeylê vaye ameya kerdiş û wendekar emserr bi vayeya werdî dest bi perwerdeyî kerdî û nê çîyan vat: “Unîversîteya Ege, Dokuz Eylul û Demokasîye de werd vaye kerdî. Tegêrayîşêk şenik virazîya. La vera vayeyan de çalakî û kampanyaya îmzeyan ame destpêkerdiş. Ganî nê aktîvîte û çalakîyî bêrê dewamkerdiş. Wendekar nêeşkenê şêrê tîyatro û konseran. Cayê ke tede bimanê çin o, îdareyê înan baş nîyo û nêeşkenê xo weye bikerê. Raştîyêk winasî esta. Unîversîte tena wendiş nîya. Ma şertê bê asayîş de yê. Seba ma wendekaran rêxistinbîyayîş xeylê muhîm o.”