AMED - Hemşaredara Bismilî Gulşen Ozere dîyar kerd ke bi tayînkerdişê qeyûman îradeyê şarê kurdî yeno xespkerdiş û qeyûmê ke ameyî tayînkerdiş nêresayî amancê xo. 

 

Mabenê serranê 2016-2019î de bi tayînkirdişê qeyûman ê seba şaredarîyan îradeyê şarî ame xestpkerdiş û Kurdistan de xeylê problemî bi qeyûman reyde rî dayî. Îradeyê şarî çinî ame hesibnayîş û kesê ke ameybî weçînitiş kar ra ameyî girewtiş, dezgehî bê tesîr ameyî verdayîş. Hemşaredara Bismilî ya Amedî Gulşen Ozera ke qeyûm tayînê herinda aye ame kerdiş û Hemsereka Partîya Têduştî û Demokrasîye ya Şaran (HEDEP) Zeynep Okane derheqê babete de ercnayîş kerdî. 

 

‘Dewlete seba ke îqtîdarîya xo bipawa qeyûm tayîn kerde’ 

 

Gulşene da zanayîş ke dewlete îradeyê şarê kurdî nas nêkena û seba îqtîdarîya xo bipawa, hetgiranê xo weye bikera qeyûm tayîn kerde û bi tayînkerdişê înan îradeyê şarê kurdî xesp kerdî. Gulşene nê çîyan vat: “Bi tayînkerdişê qeyûman îradeyê şarê kurdî ame xespkerdiş. Hedefê ewil ê qeyûman destkewtişê cinîyan bî. Hêzê cinîyan, xurtbîyayîşê cinîyan, sîstemê destkewtişê cinîyan ra tersenê. Qeyûm senî ke ame cinîyan hedef girewt. Kesê ke komel eşkenê bibedilnê cinî yê.”

 

‘Qetilkerdişê cinîyan zî polîtîk o’ 

 

Gulşene sebebê hedefgirewtişê cinîyan wina vat: “Cinî awankar a, cinî tut ana dinya pîl kena û bi komelî dana qezenckerdiş. Coka ra zî cinîyê xurt û cinîyê ke têkoşîn danê ceza kenê û şirawenê surgun. Xeylê cinîyê têkoşer zîndanan de yê. Îqtîdar hêrişê cinîyanê xurt keno. Kiştişê cinîyan zî polîtîk o. Eke cezayêka bi tesîrin bidîyayêne kerdoxan do no qetilkerdiş nêbayêne. Îqtîdar Kurdistan de bi destê îqtîdarî hêrişê bîyayîş û ziwanê kurdan keno. Ma bi kurdî qisey kenê la ziwanê kurdî de perwerde çin o. Mekteban de sey dersê weçînayîşî yeno dayîş. Hedefê îqtîdarî çinîkerdişê kultur û ziwanê kurdî yo.” 

 

Gulşene qiseykerdişê xo yê peyênan de bale ant serê weçînayîşê herêmî yê 31ê Adara 2024î û vat ke do şar wayîrê îradeyê xo bivejîyo, se beno wa bibo do destur nêdê ke bi îradeyê înan bêro kaykerdiş û heqê înan bêrê xespkerdiş

 

‘Şarê kurdî bi qeyûman ceza kenê’ 

 

Hemsereka HEDEPî ya Yenîşehîrî Zeynep Okane zî dîyar kerd ke qeyûm metodê cezakerdişê şarî yo û ard ziwan ke bi tayînkerdişê qeyûman komel de şikitişêk virazîya û wina dewam kerd: “Zîhnîyetê serdest xo bi qeyûman reyde hîna zêde mojna. Na herre ser de bîyayîşêk ma yê ke hêzê cinî û têkoşînê cinîye dabî raşte, estbî. La bi qeyûman reyde sîstemêk ke nê heqan cinîyan ra bigîro ame averberdiş.”