Zelal Tunç

 

WAN - No di serrî yo şaredarîya AKPyî eşteyan rijnena Çemê Botanî û nê eşteyî jehrî vila kenê. ‘Tesîsê Pêserkerdişê Kelepulê Huşk ê Entegreyî’ şaredarîya HDPyî serra 2021î de kerd falîyet û qerar ame girewtiş ke eşteyan birijnê tesîsî. Vera nê de zî qerar pê nêame. 

 

Qezaya Şaxî yê Wanî yê Çemê Botanî bi rengê xo merdiman matmayî verdeno. La semedo ke şaredarîya AKPyî eşteyan dormeyê çemî de vila keno, ekosîstem zirarêk gird vîneno. 5 kîlometre durê qezaye de kişta rayîro ke şino Berwarî ya Sêrtî de eşteyê keyeyan, plastîk, heywanê merde boyêk gird vilayê dorme kenê û bi tesîrê vayî reyde kewenê mîyanê çemî. Her ca açarîyayo sergo û mîyanê ci ra zî duye berz beno. Ame zanayîş ke şaredarî no di serrî yo uca sey raşteyê eşteyî şixulnena. Ama vatiş ke awa çemî sey awa şimitişî zî yena şuxilnayîş û semedo ke eşte keweno mîyanê awe cuya gandaran kewena tehluke. Eşteyê mîyanê çem û rayîrî lefîyenê tekelê wesayîtê ke rayîr ra derbaz benê û bi no hawa eşte vilayê raşteyêk hîra benê. 

 

Qerarê ke ameyî girewtiş ameyî binpaykerdiş

 

Sewbîna wextê Partîya Demokratîke ya Şaran (HDP) de bi paştîdayîşê Yewîya Ewropaye (YE) serê rayîrê Westan û Qelqelî yê Wanî de serra 2021î de ‘Tesîsê Pêserkerdişê Kelepulê Huşk ê Entegreyî’ ame awankerdiş û qerar ame girewtiş ke eşte bierzîyê nê tesîsî. Vera nê qerarî şaredarîya AKPyî eşteyan nêrijnena uca. Qeyûm eşteyanê xo rijneno çemê Botanî.