Elfazî Toral

 

STENBOL - Dadîyê Aştîye dîyar kerdî ke bi serran o vera hêrişan de têkoşîn kenê û vatî: “Îsraîl se serrî yo nê hêrişî dewam keno. Tirkîya hezar serrî ra zilmê kurdan kena. Wa Erdogan fek Rojawanî ra vera bido. Wa fek qetilkerdişê kudan ra vera bido. Êdî bes o. ma venga her kesî kenê ke seba Rojawanî vengê xo berz bikerê.” 

 

Hêrişê Tirkîya 4ê teşrîna teşrîna verêne ra nata vera Bakur û Rojhelatê Sûrîye de dewam keno. Herême de xeylê îstasyonê awe û cereyanî, tesîrê petrolî, nêweşxane, keye, dew û wesayîtî ameyî bombardumankerdiş. Reyna hêrişan de hem cinî û hem zî tutî ameyî hedefgirewtiş. Xeylê kesî dinyaya xo bedilnayî û birîndar bîyî.

 

Hêrişê Tirkîya yê hemverê herême de dewa Şealê û qezaya Til Rifatî ya Şehbaye ya girêdayeyê Şêwarxa ya Şera ya Efrînî ameyî bombardumankerdiş. Daristanê dewa Soxanekê ya Şêrewa hedef ame girewtiş. Hêrişan de Kobanê de dewa Ehmed Munîrî ame hedefgirewtiş. Hêrişanê 10 rojê peyênan yê hemverê Mexmûrî de 7 kesî birîndar bîyî û ciwanêk ame qetilkerdiş. Reaksîyonê vera hêrişan dewam keno. 

 

Endama Însiyatîfê Dadîyê Aştîye ya Stenbolî Bedîa Gokyuz û Guler Bugdaye derheqê hêrişanê hemverê Rojawanî de qisey kerd. 

 

‘Tirkîya hezar serrî yo zilm kena’ 

 

Bedîaye ard ziwan ke ziwan, dîn, nîjadê şerî se beno wa bibo çîyêk baş nîyo û wina vat: “Şer gonî yo, qirkerdiş o. Şer tena şaranê bindestan çinî nêkeno. No parçeyêk sîstemê kapîtalîst o. Tirkîya hêrişê Rojawanî kena. Hêrişê awe, nan, nêweşxaneyanê înan kena. Exlaqê şerî zî esto. Tirkîya di roje verê cû hêrişê camî zî kerd. Tirkîya Fîlîstîn rê vana aştî pê bîyare. Wa sere de aştîya xo pê bîyara. Îsraîl no se serrî yo nê zilmî keno. Tirkîya bi hezaran serrî yo hêrişê kurdan kena. Keyeyê kurdan, herra kurdan veşêna.”

 

‘Êdî bes o’ 

 

Bedîaye dîyar kerd ke her tim ê vera şerî de yê û wina dewam kerd: “Ma kesê ke benê sebebê şerî lanet kenê. Seba menfîetê xo şer vejenê. Ma dadî şer nêwazenê. Dinya bedilnayî gola gonî. Wa destê xo serê mazluman ra biancê. Êdî bes o. Zilmê serê şarê kurdî yê şarê Fîlîstînî aciz kerdî. Kes zilmê serê ma nêvîneno. No zilmê serê ma wa wedarîyo.”

 

‘Şerekî bêexlaqî rayîr ra benê’ 

 

Verfeka Meclîsê Dadîyê Aştîye Guler Bugdaye zî ard ziwan ke bi serran o aştîye qîrenê û wina vat: “Serê şarê kurdî de polîtîkayê şerî rayîr ra benê. Serê cinî û tutan de her tim şer yeno rayîr ra berdiş. Ma destê aştîye rayîr ra benê la ê bi çekan hêriş kenê. Ma hetê şerî de nîyê. Ma şer lanet kenê. Serê şarê Rojawanî de hêrişêk gird esto. Tirkîya hêrişê Rojawanî kena. No tu huqûqêk de çin o. Şarê kurdî qet vera şerî de sere çewt nêkerd. Xoverdayîş dewam keno." 

 

Seba Rojawanî veng 

 

Gulere qiseykerdişê xo yê peyênan de wina vat: “Ma şarê kurdî şer nêwazenê. Ma aştîye wazenê. Sebebê heme krîzan şer o. Kesê ke Rojawan de cinî û tutan qetil kenê terorîst ê. Ez venga her kesî kena ke nê şerî qebul nêkerê û têkoşîn bikerê. Şarê kurdî seba her kesî aştî wazeno. Fek qetilkerdişê kurdan ra biverdê. Êdî bes o.”