Melek Avci-Dîlan Babat

 

ANQARA - Sekretera Pêroyî ya Basta Fransîska Stîere dîyar kerd ke xeylê dewletî bi Îsraîlî reyde mîyanê paştîdayîşî de yî û tay zî Fîlîstînî reyde û vat: “La ma ewnîyenê ke kes qala şero ke Rojawanî de yeno rayîr ra berdiş nêkeno. Eke ma îqtîdaro ke zilm keno ra hêvî bikerê do çareserî pê nêra.” 

 

Rojevê sereke yê kongreyê Partîya Çep a Keske ke şîye bedilnayîş mîyan û bî Partîya Têduştî û Demokrasîye ya Şaran (HEDEP) û hemserekê ci Tulay Hatîmogullari û Tuncer Bakirhanî ameyî dîyarkerdiş, yenê munaqaşakerdiş. Yew rojeva sereke ya ke kongre de yena munaqaşakerdiş tecrîdê giran ê serê Rayberê PKKyî Abdullah Ocalanî yo. 

 

Sekretera Pêroyî ya Basta ya Swîsreye (Basels Starke Alternatîve) Franzîska Stîera ke tewrê kongreyê HEDEPî bî derheqê tecrîdê serê Abdullah Ocalan û kongreyî de qisey kerd.

 

‘Tirkîya dewletêk faşîst awan kerde’ 

 

Franzîskaye da zanayîş ke Tirkîya dewletêke faşîst awan kerda û wina vat: “Tena vera koma parlamenterê kurdî de nê vera heme muxalefetî de teda esta. Sey vera xozaye, vera kurdan û cinîyan de zî şerêk yeno rayîr ra berdiş. Ewro ma bernameyê munaqaşayî yê siyasî yê seba aştîye rayîr ra benê. Ma her çîyî seba aştî û paştîdayîşî kenê. Ma seba aştîye têkoşîn kenê. Kongreya HEDEPî de zî seba pakîkerdişê astengîyan sînyalêk o.” 

 

‘Seba azadîya fîzîkî ya Birêz Ocalanî veng’ 

 

Franzîskaye bale ant serê tecrîdê giran ê serê Abdullah Ocalanî û venga azadîya fîzîkî kerd. Franzîskaye wina dewam kerd: “Bi serran o Tirkîya vera heqê merdiman de têgêrena. Xeylê dezgehê ma estê. Yewîya Ewropa, Mehkemaya Heqanê Merdiman a Ewropa û xeylê dezgehê heqanê merdiman. Nê dezgehî heme vatî ke tecrîd vera heqanê merdiman de yo. Xeylê hêzê siyasî vera sîstemê tecrîdî de yê. La şansê munaqaşakerdişî heqanê merdiman çin o. Coka ra zî wedaritişê tecrîdî û azadîya fîzîkî ya Ocalanî vengêk mîyanneteweyî yê Tirkîya yo.”

 

‘Bi pawitiş çareserî mumkun nîya’ 

 

Franzîskaye qiseykerdişê xo yê peyênan de ard ziwan ke bi tecrîdî reyde şerê Rojhelatê Mîyanenî û Kurdistanî giran beno û no tewr zêde tesîrê xo serê şarê sivîl û cinîyan de keno. Franzîskaye wina peynî kerd: “Ma vînenê ke kesê ke tewr zêde şerî de dej ancenê û tesîr benê cinî û tut ê. xeylê dewletî bi Îsraîlî reyde mîyanê paştîdayîşî de yê û tay zî Fîlîstînî reyde. La ma ewnîyenê ke kes qala şero ke Rojawanî de yeno rayîr ra berdiş nêkeno. Eke ma îqtîdaro ke zilm keno ra hêvî bikerê do çareserî pê nêra. Seba komelêk aştîyane ganî ma sere de bombeyan bidê vindertiş.”