AMED - Hemkarîya qeyûmê tayînê şaredarî bîyê û Wezaretê Kultur û Turîzmî, Sûrê Amedî Festîvala Rayîrê Kulturê Sûrî pê yeno. Kaybaze Elvan Koçere da zanayîş ke amancê na festîvale asîmîlasyon o û vat, hemverê nê de her cayê Kurdistanî de ganî pêro sazgehê kurdî têkoşîn bikerê.

 

Îqtîdarî Kurdistan de hemverê kulturê kurdî de polîtîkayê hêriş û asîmîlasyonî bi metodê cîya dewam keno. Heto bîn ra zî binê nameyê festîvala kulturî de polîtîkaya şerê taybetî dewam kena Amed de hetê Wezaretê Kultur û Turîzmî ra ame plankerdiş ke konserê binê nameyê ‘Festîvala Rayîrê Kulturê Sûrî’ pê bêro. La her çiqas konser semedê şerê mabêne Israîl- Fîlîstînî ra bêro betalkerdiş zî hîn bernameyî ameyî organîzekerdiş. Kaybaza Tîyatroyê Bajarê Amedî Elvan Koçere, derheqê festîvale û amancê ci de qisey kerd.

 

‘Festîvala ke xitabî şarî nêkena organîze kenê’

 

Elvane dîyar kerd ke na festîvala ke organîze kenê,   parçeyêk polîtîkaya asîmîlasyonî ya û wina vat: “Wexto ke ma muhtewayê na festîvale ewnîyenê, bernameyê ke xîtabê şarî nêkenê vejîyenê werte. Na festîvala kultur û ziwanî asîmîle kena, xîtabê herême nêkena û na festîvale hetê kesê ke eleqeyê înan bi komelî reyde çin o yena organîzekerdiş. Rayîr ra berdişê polîtîkaya asîmîlasyonî de rolê qeyûmî esto. Dewlete kultur, ziwanê xo ferz kena. No zî yeno manaya asîmîlekerdişê komelî.”

 

‘Pereyo ke asîmîlasyonî rê xerc kenê lazimîyan rê xerc nêkenê’ 

 

Elvane ard ziwan ke krîzê ekonomîye de dewlete ne seba lazimîyê komelî, ne zî seba lazimîyê xo mesref kena û wina vat: “Nika problemê tewr gird ê welatî krîzê ekonomîye yo. Wexto ke krîzêk wina bibo dewlete herinda organîzasyonê wina girdan de ganî seba çareserîya krîzî çîyêk bikera. Wexto ke krîz bibo, merdim sînorê vêşanîye de bibo qey hende pere produksîyonê winasî rê yeno xerckerdiş.”

 

‘Şarê ma kulturê xo tercih keno’ 

 

Elvane dîyar kerd ke komelê kurdî wayîrê adetêk xoverdayox ê girdî yo û komelêk polîtîk o û wina qiseykerdişê xo peynî kerd: “Komel zano ke dewlete bi çi amancî serê na herre de nê çîyan kena. Vera înan polîtîkayanê asîmîlasyonî de alternatîfê şarê kurdî zî esto. Ganî şarê ma çîyê aîdê kulturê xo ziwanê xo tercih bikero. Her cayê Kurdistanî de dezgehê ke şarî rê xizmet kenê, estê.”