Nazlican Nûjîn Yildiz

 

ÎZMÎR - Rabîa û keyeyê xo 30 serrî verê cû tedaya dewlete vera Êlih ra koçê Îzmîrî kenê. Vera tedaya ke Îzmîr de zî dewam kerd, têkoşînê înan zî peynî nêbî. 

 

Tedaya dewlete û semedo ke qorîcîtî qebul nêkerdî Rabîa Yilmaz û keyeyê xo Êlih ra Koçê Îzmîrî kenê. Rabîaya ke vera heme tedayan fek têkoşînî ra vera nêdana, Îzmîr de zî çîyo ke sere de kena tewrê xebetan bena. 

 

Hem tedaya dewlete û hem zî ya Hîzbullahî 

 

Rabîaye da zanayîş ke 30 serrî verê cû dewa Kanîya Girdî ya Heskîfî ra keye barkerdî merkezê Êlihî û tedayan vera mecbur mendî ke koç bikerê. Rabîaye wina vat: “Qorîcîyî bi mêrdeyê mi ferz kerdî. Mêrdeyê mi nêbî qorîcî. 40 rojan îşkence bi ci kerdî. Se kerdî zî mêrdeyê mi nêbî qorîcî. Teda û hêrişan vera ma koçê Êlihî kerd. Ma uca de zî perîşan bîyî. Ma nêeşkayî kîra bidê. Çare nêmend. Ma çer serrî uca de mendî. Kontra, hîzbullah pey mêrdeyê mi û tutanê mi de bî. Îşkence bi lajê mi yê 13 serrî kerdî.”

 

Têkoşîn dewam kerd 

 

Rabîaye dewamê qiseykerdişê xo de wina vat: “Teda û problemê ekonomîye vera ma ameyî Îzmîr. Mêrdeyê mi Îzmîr de zî tutanê xo rê vat şêrê partîya xo, ez qet fek partîya xo ra vera nêdana. Ma bi hemkarîye nasan şîyî partîya xo. Ma tewrê xebatan bîyî. Uca de zî ma bîyî bela. Şibakê ma şikitî. Mêrde û tutî mi ameyî tepiştiş. Ma se kerd, ma tedayan ra nêxelesîyayî. Ma HDPyî yê û ma do her tim partîya xo de bê.” 

 

Dewe ra vejîyayî la teda dewam kerd 

 

Rabîaye ard ziwan ke semedo ke kurd bîyî teda bi înan kerdî û wina vat: “Îzmîr de keyeyê xo de zî ma aciz kerdî. Ma kesê ke ameyî keyeyê ma rê vat ke ma do xebata xo dewam bikerê. Mêrdeyê mi ge-ge şîyêne dewe. Ez nêşêne. 30 serrî yo mi dewa xo nêdîya. Dewa ma talan kerdî, daran birnayî, baxçeyê ma veşênayî. Çîyêk ma nêverdayî. Ez zî nêwazena wina bivîna. Wexto ke ma dewe de bî mektebê ma kerdî qereqol. Uca de îşkence bi merdiman kerdêne. La vera heme tedayan ma do wayîrê kulturê xo bivejê. Ma do têkoşînê xo dewam bikerê. Ma zî wazenê agêrê dewa xo. Heqê ma zî esto.” 

 

Rabîaye qiseykerdişê xo yê peyênan de bale ant serê rewşa tepişteyê nêweşan û derheqê babete de wina vat: “Zîndanan de zilm bi merdiman kenê. Ê merdimî nêweş ê. Her tewirê nêweşîye esta. Nêeşkenê lazimîyanê xo bîyarî ca la înan kenê hucreyan. Nê tepişteyan nêverdenê. Tahlîye nêkenê. Ganî no zilm peynî bibo.”