Dîlan Babat - Melek Avci

 

ANQARA - Koordînatora DYK FASê Bakurê Afrîkayî Khadija Ryadî da zanayîş ke fikrê Abdullah Ocalanî girseyê pîlî de veng dayê û sîstemê demokratîke ya bi serkêşîya cinîyanê Rojawanî ameya awankerdiş, welatê rojawanî yê averşîyayeyî hîn zêdeyêr vernî de yo.

 

Partîya Çep a Keske 15ê teşrîna verêne de Salona Sporî ya Ataturkî ya Anqarayî de bi coşêk pîl 4ine kongreya xo ya pîle pê ard. Kongreye de nameyê partî zî ci de xeylêk vurnayîşî ameyî kerdiş û pêwa Tirkîya û Kurdistanî; Ewropa, Rojhelata Mîyanên û Başur bi desan heyetî tewrê kongreya Partiya Çep a Keske bi nameyê Partîya Têduştî û Demokrasî (HEDEP) taqîb kerdî.

 

Kordînatora Rayîr ra şîyayîşê Cinîyan ê Dinya ya FASî (DYK) ya Bakurê Afrîkayî û Sereka verî ya Komeleya Heqê Merdiman ê Fasî Khadija Ryadî (Hatîce Riyadî) persê ma cewab kerd. Khadija dîyar kerd ke pêwa pêro zextê serê partîye, kongre bi hawayêkê xurt derbaz bîya. 

 

‘Fikrê Birêz Ocalanî pêro hetan ra yeno qebûlkerdiş’

 

Khadija da zanayîş ke tecrîdê serê Rayberê PKKyî Abdullah Ocalanî nêzdî ra taqîb kenê û dîyar kerd ke  tecrîdkerdişê Abdullah Ocalanî hemverê huqûqî yo û wina vat: “La pêwa nê fikrê birêz Ocalanî hetê girseyê pîlî ra yeno qebûlkerdiş. Ma fikrê Birêz Ocalanî her hetî ra taqîb kenê. Ez herêma xo welatê ke manena tahlil û analîzê Birêz Ocalanî bi erc vînena. Ercnayîşê ey yê derheqê cinîyan de, destkewtişê cinîyan yê netîceyê nê tahlîlan de ameyê bidestkerdiş, bi erc vînena. Sey xeylêk huqûqnasan mi zî semedê wedaritişê tecrîdê serê Birêz Ocalanî îmza eşt. Wedaritişê tecrîdî yew waştişê ma yo.”

 

‘Şar seba şero ke bi înan yeno ferzkerdiş çekan wedarneno’ 

 

Khadijaye dewamê qiseykerdişê xo de ard ziwan ke têkoşînê şarê kurdî fîlmê ‘Rayîr’ yê Yilmaz Guneyî ra musaya û vat ke şarê kurdî xeylê qedîm o û vat ke her ke bedel dayî dîya ke xeylê çiyan musaya. Khadijaye wina dewam kerd: “No şar vera zilmo ke bi înan yeno kerdiş, pawitişê xo şuxilnayîşê çekan de vîneno. Şar semedê aştîye çekan berz keno. Vera şero ke yeno ferzkerdiş de xover dano. Şaro ke çekan berz keno semedê tayînkerdişê heqanê xo têkoşîn dano. Nê têkoşînî de rolê cinîyan zaf gird o. Esasê xo de têkoşînî de aştî esta.”

 

 ‘Ma dî ke ma zaf tepîya mendî’ 

 

Khadijaye ard ziwan ke têkoşînê cinîye de welatê Bakur ê Afrîka xeta têkoşînî aver berdî la dimayê têkoşînî cinîyan Rojawan de dî ke rewşe bedilîyaya û nê çîyan vat: “Qanûnê ke Rojawan de ameyî vetiş ma matmayî verda. Destkewtişê cinîyan ma matmayî verda. Ma fehm kerd ke ma çend tepiya mendê. Ma dî ke destkewtişê cinîyan goreyê welatê Rojawanî yê averkewte çend aver kewtî.”

 

‘Têkoşînê cinîyan do aştî bîyaro’ 

 

Khadijaye qiseykerdişê xo yê peyênan de nê çîyan vat: “Ma wazenê hem bi têkoşînê cinîya kurde û hem zî bi têkoşînê Rojawanî rê bibê hemkar û na nuqta de bi têgêrayîşê cinîyan reyde têkilîyan aver berê. Şar seba aştîye têkoşîn keno. Têgêrayîşê cinîyan zî yew payê muhîm ê nê têkoşînî yo. Şarê ke semedê aştî û demokrasî têkoşîn kenê, ganî paştîdayîş hîna gird bikerî. NY zî tede mîyanê têkoşînê winasî de rolê cinîyan yeno zanayîş û na nuqta de xebatî yenê kerdiş. Bê cinîyan aştî mumkun nîya. Têkoşînê cinîyan do aştî bîyaro. Ganî şar vera sîsteman de têkoşînê xo dewam bikero.”