Rabîa Onver

 

COLEMÊRG - Menîca Şakara ke dewa Bêgozaya Şemzînanî de berardişê tûtinî kena wina vat: “Ma nêeşkenê debara xo bikerê. Cayêk ra ameyîşê ma çin o. Ma nêwazenê ramitişê tûtinî bêro qedexekerdiş. Qet nêbo ma pê debara xo kenê.”

 

Dewa Bêgoza ya Şemzînanê Colemêrgî de cinî bi berardişê tûtinî debara xo kenê û hemverê krîzê ekonomî, şer û qedexeyan têkoşînê înan dewam keno. Raşteyê ramitişî ke semedê polîtîkayê şerî roj bi roje teng benê, krîzê ekonomî hîn zêdeyêr giran kenê. Goreyê Qanûnê Têkoşînê Kaçaxwanan ê Hûmara 5607 heta Wezaretê Kulturî û Daristanî belgeyî nêrê girewtiş yan zî waştiş nêro kerdiş, semedê kesê bazirganiyê tûtinî kenê di serran ra  heta 5 serran cezaya zîndanî yena dayîş. Kesê wazenê belgeyê rayeyî bigîrê zî 50 mîlyon TL tezmînat înan ra yeno waştiş.

 

Cinî hetêk hemverê qedexeyê tûtinî têkoşîn kenê, heto bîn ra zî hasadê tûtinî kenê. Aşma êlule û teşrîna verêne de tûtin yeno arêdayîş. Cinîyê ke camêrdan ra hîna zêde kede danê, semedê krîzê ekonomî keda înan çinî bena.

 

‘Debare zehmet bîya’

 

Menîca Şakara 60 serrî bi karê pesdewarî, baxçe û tûtinî reyde eleqedar bena. Menîca wina vat: “Aşma hamnanî de ma baxçe virazenê û tûtin arêdanê. Ma cinî bi baxçe, tûtin û pesdewaran reyde eleqedar benê. Camêrdî zî tenê heywanan rê ewnîyenê. Ma  bi pereyê keda xo semedê zimistanî xidayan gênê. Semedê zimistanî dewe de kar çin o. Lajêk mi tepişte yo. Ma bi pereyê ke qezenc kenê, ewnîyenê ey ra. Ma hamnanî şuxilênê, zimistanî pere qedêno. Her çî vaye bîyo. Debare zaf zehmet bîya.”

 

‘Verê her çî erjan bi’

 

Menîca wina dîyar kerd: “Emrê mi derbaz bi. Kar zehmet o. Ez ewnîyena pesî ra. Ez şina zozanan. Ma wesayît kîra kenê. La benzîn zaf vaye yo. Ma  zehmetîyan ancenê. Berardişê tûtinî zî zaf zehmet o. Ma beramberê keda xo nêgînê. Ma hamnanî tûtin arêdanê. Ma di hîrê rojan reyke awe danê. Ma dima ra arêdanê, wuşk kenê. Dima ra goreyê kalîteyî ma vay danê. Serra vîyarte kiloyê tûtinî 700 TL bî. Emserr zî hezar TL yo. La her çî vaye bîyo. Ma beramberê keda xo nêgînê.”

 

Wa rotişê tûtinî nêro qedexekerdiş

 

Menîca peynî de dîyar kerd ke wa rotişê tûtinî nêro qedexekerdiş û wina vat: “Ma tûtin nêroşê do rewşa ma zaf xirab biba. O zî bêro qedexekerdiş ma nêzanê se bikerê. Xora ma debare nêkenê. Ameyîşêk ma çin o. Wa rotişê tûtinî nêro qedexekerdiş. Qet nêbo ma pê debara xo bikerê.”