Oznur Deger

 

MÊRDÎN - Dîlber Tanrikuluya ke cezaya muebeto giran aye rê ameya birnayîş û zîndanê Asayîşî Berz ê Tîpê Fyî yê Hûmara Yewine yê Kandiraye de manena, hetê Wezîrîya Ekonomî û Xezîneyî ra 5 hezar û 420 TL bedelê îaşe teblîgê adresê keyeyê aye rê ame kerdiş. 

 

Dîlber Tanrikuluye rê cezaya muebeto giran ameya birnayîş û zîndanê Asayîşo Berz ê Tîpê Fyî yê Hûmara Yewine yê Kandiraye de tepişte ya. Keyeyê Dîlbera ke Mêrdîn de ciwîyeno, Wezîrîya Ekonomî û Xezîneyî 5 hezar û 420 TL bedelê îaşe teblîgê adresê keyeyê aye rê kerd. 

 

5 hezar û 420 TL pereyê werdî waşt 

 

Teblîgat de ame dîyarkerdiş ke 5 hezar û 420 TL ke mesrefê werdî aîdê yew serrî yê mabenê aşmanê çeleyê 2022 û kanûna 2022yî yo û ganî bilez bêro şirawitiş û rewşa ke nêra dayîş de do bi zemî bêda girewtiş. 

 

Serra 2016î ra heta nika tepişte ya 

 

Dîlbera 26ê Gulana 2016î de qezaya Nîsêbînî ya Mêrdînî de wextê qedexeyê tebervejîyayîşî de ameye tepiştiş. Dîlbere wexto ke qedexe dewam kerdêne mîyanê korîdoro ke ci ra 17ê ci tutî temamî 70 kesî vejîyabî de ca girewtêne û parçeyê şarepnelî çaqeyê aye ra vejîyabî. Hîrê aşman Nêweşxaneyê Dewlete yê Mêrdînî de ameye dermankerdiş. Dima ra aye vetî mehkema û ameye tepiştiş û erşawîyaye zîndanê Tîpê Eyî yê Mêrdînî. Bi îdîayê yewîya dewlete xira kerda cezaya muebeto giran aye rê ameye birnayîş. 

 

Hîrê reyan amelîyat bîye

 

Serra 2018î de surgunê zîndanê Sîncanî ameye kerdiş. Semedo ke parçeyê şarepnelî çaqeyê aye de estbî hîrê reyan amelîyat bîye û lîsteya nêweşê giran ê ÎHDyî de ca gêna. No yew serrî yo ke zîndanê Asayîşo Berz ê Tîpê Fyî yê Hûmara Yewine yê Kandirayî de tepişte ya.