Mîdye Miqted

 

HELEB - Cinîyê ke tewrê panelê semedê azadîya Rayberê PKKyî Abdullah Ocalanî bîyî dîyar kerdî ke semedê azadîya fîzîkî ya Abdullah Ocalanî na xebate û do têkoşînê xo dewam bikerê û wina vatî: “Semedo ke ma sosyolojî û fikrê Raybertî yê seba çareserkerdişê şer û pêkewtişê dinya bidê aver, ma do têkoşîn û xebata xo dewam bikerê.” 

 

Tecrîdê giran ê serê Rayberê PKKyî Abdullah Ocalanî dewam keno. Avûkatê Baroyê Huqûqî yê Asrinî Cengîz Yureklî, Raziye Ozturk, Îbrahîm Bîlmez û Emran Emekçî seba pêvînayîşê bi Rayberê PKKyî Abdullah Ocalanî ke Zîndanê Îmraliyî yê Tîpê Fyî yê Asayîşo Berz de yeno tepiştiş û 2 serrî ra zêde yo yanî 31 aşmîyo tu xeberêke ci ra nîna girewtiş, muracatê Serdozgerîya Komare ya Bursa û Mudirîya Zîndanê Îmraliyî yeno kerdiş. Sewbîna avûkat û keyeyî seba pêvînayîşê bi Omer Hayrî Konar, Hamîlî Yildirim û Veysî Aktaşî her tim hem muracatê dozgerîye û hem zî muracatê mudirîya zîndanî kenê. La her reye pêvînayîş bi bahaneyanê tewşan yeno redkerdiş. 

 

Kar û xebatê vera tecrîdê giran û derheqê fikr û felsefeya Abdullah Ocalanî zî dewam kenê. Rojawanê Kurdistanî de zî her tim aktîvîteyê vera tecrîd û azadîya Abdullah Ocalanî yenê kerdiş. Taxa Şêxmeqsûdî ya bajarê Helebî de bi tewrbîyayîşê Însiyatîfê Azadîya Rayber Abdullah Ocalanî yê Sûrî, Însiyatîfê Avûkatê Sûrî yê Pawitişê Rayber Abdullah Ocalanî û bi tewrbîyayîşê xeylê partîyê sîyasî panel ame viraştiş. Endamê Însiyatîfê Azadîya Rayber Abdullah Ocalanî yê Sûrî Zeyneb Hebeş û Endama Partîya Yewîya Demokratîke (PYD) Ayşe Hisoye derheqê babete de qisey kerdî.

 

‘Ma do azadîya Raybertî meşru bikerê’ 

 

Endama Însiyatîfê Azadîya Rayber Abdullah Ocalanî yê Sûrî Zeyneb Hebeşe derheqê panelo ke ame viraştiş de wina vat: “Binê hemleya 'Azadî semedê Rayber Apo û çareserîya sîyasî semedê dewaya kurdî' de ma panelê xo pê ard. Panel de xeylê partîyê sîyasî taxa Şêxmeqsûd, Eşrefiye ra û vîşêrê wirdî taxan sewbîna bi rayîrê skaype zî Misir, Fransa û Lubnan ra tewrbîyayîşê panelî virazîya. Dewamkerdişê xebatan û xurtkerdişê têkilîyê bi partîyê siyasî reyde ma do azadîya Rayberî meşru bikerê û meseleya kurd çareser bikerê.” 

 

‘Ercnayîşê muhîmî ameyî kerdiş’ 

 

Endama Partîya Yewîya Demokratîke (PYD) Ayşe Hisoye derheqê tewrbîyayîşê panelî de qisey kerd û wina vat: “Na xebata ke Însîyatîfê Sûrî yê Azadîya Rayber Apoyî pê ard de xeylê partî û şexsîyetê sîyasetmedarî tewrê ci bîyî. Heleb û teberê ci ra seba ercnayîşê rewşa komployî yê hetê sîyasî ra xeylê kesî tewrê panelî bîyî. Eynî wext de hetê qanûnî û huqûqî ra ercnayîşî ameyî kerdiş.”

 

'Bi zanebîyayîş tecrîdî giran kenê' 

 

Dewamê qiseykerdişê xo de Ayşeye dîyar kerd ke yeno waştiş ke pêkewtişê Rojhelatê Mîyanenî bêro dewamkerdiş û nêro çareserkerdiş û wina dewam kerd: “Heme partîyê siyasî yê bi ercnayîşê xo yê dewlemendan panel de ca girewtî û dayî zanayîş ke komployê serê Raybertî çaresernêkerdişê meseleya kurd o. Sewbîna wazenê pêkewtişê Rojhelatê Mîyanenî dewam bikero. Bi bo hawa bi zanebîyayîş tecrîdî giran kenê. Eynî wext de wezîfeyê ma yê semedê azadkerdişê Rayber Apoyî çi yo, na nuqta ser de ame vindertiş.” 

 

'Têkoşîn heme hetan ra dewam keno’ 

 

Peynîya qiseykeridşê xo de Ayşeye wina vat: “Heme partîyê ke tîya de amade bîyî do têkoşînê xo dewam bikerê. Do heme partîyî bi yew destî û azadîya raybertî meşru bikerê ke heme hetê sîyasî, komelkî de têkoşîn bêro girdkerdiş. Seba ke ma sosyolojî û fikrê Raybertî yê seba çareserkerdişê şer û pêkewtişê dinya bidê aver, ma do têkoşîn û xebatê xo dewam bikerê.”