ÎZMÎR - Dadgeha Îstînafî dewaya Denîz Poyraz ke netîceyê hêrişê hemverê awanîya HDPyî ya Îzmîrî de amebî qetilkerdiş, pêro muracatan hemverê qereran red kerd. 

 

Kiştoxê bi nameyê Onur Gencer 17ê hezîrana serra 2021ine de hemverê awanîya Partîya Demokratîke ya Şaran (HDP) ya Îzmîrî de hêrişê çekdarî kerd û xebatkara partîye Denîz Poyraz qetil kerd. 27ê kanûna 2022ine de semedê dewaya Denîz Poyraz qerar ame dayîş. 6ine Dadgeha Cezaya Giran ya Îzmîrî bi sebebê sûcê “bi plankerde û bi qesdî qetil kerdo” cezaya muebbetê giran, semedê sûcê “Binpaykerdişê awanî”, “Ziyanê mal” û “muxalefetê çekdarî yê hemverê qanûnan” 9 serrî cezaya hefsî da versûc Onurî. 

 

Avûkatê hetan nê ser de muracatê dadgeha corî kerdî. 1ine Daîreyê Cezayan ê Dadgeha Edliyeyî ya Herêmî ya Îzmîrî hetê usûlî ra qerar betal kerd û dadgeha herêmî açarna. Îstînafî, dîyar kerd ke zabitnameyê hîn roniştişan de îmza kêm ê, qerarê bisebeb avûkatanê hetan rê nêameyo şirawitiş û nuşteyê derheqê teblîxkerdişê dosyayan nêameyê zêdekerdiş. Dadgeha herêmî kêmanîyê bîyaye temam kerd û dosya reyke bîn şirawitî îstînaf. 

 

1ine Daîreyê Cezayan, badê temamkerdişê kêmîyan, qerarê xo yê derheqê dosyaye da. Dagdgeha îstînafî temamê muracatan red kerd. Qerarê xo de daîreyî wina vat: “Avûkate Turkan Aslan Agaç (avûkata keyeyê Denîz Poyraz) semedê cezaya semedê sûcê muxalefetî yê hemverê Qanûnê Hûmara 6136î versûc  Onur Gencer rê ameyo birnayîş, muracatê îstînafî kerda. No muracat ameyo cigêrayîş û no muracat ameyo redkerdiş.” 

  

Daîreyî, muracatê semedê qerarê mehkûmkerdişî yê semedê sûcê “Ziyanê mal” û “pawitişê awanî” zî qerar da û bi sebebê “ teberê huqûqî çin o” red kerd. Îtîrazê her di hetan hemverê qerarê derheqê sûcê “Bi plankerde û biqesdî kişto” de zî ame redkerdiş. 

 

Qerar de ame vatiş ke usûl û esasê qerarî de bêhuqûqîyêk çin o, delîl û kerdişan de tu kêmanîyêk çin o, hetê îspatî ra ercnayîş ca de yo, çalakî rast ameya qalkerdiş û goreyê hawayî sûc qanûnan de yo, ceza goreyê çarçewaya qanûnî ameya dayîş û bêhuqûqîyêk ke tesîr dayeyê ceza bikero nêameyo vînayîş û îtîrazê Onurî û avûkatê ci ameyê redkerdiş. 

 

Qerarê daîreyî de vejîya werte ke Onurî waştişê tehliyeyê xo kerdo. Qerar de no waştiş ame redkerdiş.