ÇEWLÎG - Endama Heyetê Îdarekarîya Komeleya Hetkarî û Paştîdayîşê Tutan Rojda Hanaye da zanayîş ke lazimîyê tutan tespît kenê û bi bexşê ke yenê kerdiş kêmanîyan çareser kenê û venga paştîdayîşî kerd. 

 

Komeleya Hetkarî û Paştîdayîşê Tutan di serr û nîme verê cû Wan û dima ra zî Çewlîg de ameye awankerdiş. Komeleye dimayê demêk bi xebatê xo veng da û amacê komeleye zî no bî ke lazimîyê cuye û werdê ke ci ra hes kenê biresnê tutanê dewe. 

 

‘Komeleya Tutan bî dezgeh’ 

 

Rojda Hanaye da zanayîş ke Komeleya Tutan di serr û nîme yo falîyetan rayîr ra bena û sere de Wan de ameye awankerdiş. Rojdaye nê çîyan ard ziwan: “Diyar Orhan bi îmkananê xo hewl da proje dewam bikero. Dima ra eleqeyêk gird virazîya û Komeleya Tutan bî dezgeh. Komeleya ma Çewlîg zî tede xeylê bajaran de estbî. Sere de Wan û Çewlîg de ameye awankerdiş. Ma şîyî qeza û dewan. Ma paştîdayîşê ekonomî û manewî da tutan. Komeleya ma Colemêrg de zî estbî la ameye girewtiş. Nika Çewlîg û Wan de estê. Serê çapemenîya komelkî ra xo biresnê ma û ma zî xo biresnê tutanê dewan yê ke xoresnayîşê înan zehmet o.” 

 

‘Ma surprîzê şenikî amade kenê’ 

 

Rojdaye qiseykerdişê xo wina dewam kerd: “Verê ke ma şêrî mektebê dewan ma mekteban dîyar kenê. Ma mamosteyê înan ra hûmara payanê înan wazenê û emrê înan musenê. Goreyê lîsteye ma kelepulanê kirtasîye, kinc, mont û botan herînenê. Lazimî bi çina bibo ma înan amade kenê. Ma bi ekîbê xo yê Wanî reyde bi faturayanê xo yê lazimîyan dîyar kenê û kelepulan herînenê. Ma surprîzanê şenikan yê sey paste, kinc, werd, çîkolata, gidayan amade kenê. Ma tarîxo ke ameyo amadekerdiş de şinê mektebê dewe. Ma sere de tutan nas kenê, ma pîya reqs kenê. Ma dîyarêyê înan danê, sohbetan kenê, paste birnenê û uca ra şinê.”

 

‘Semedo ke ma pare kenê ma reaksîyonan gênê’ 

 

Rojdaye qiseykerdişê xo yê peyênan de da zanayîş ke bernameyê ke virazenê serê çapemenîya komelkî de pare kenê û wina qiseykerdişê xo peynî kerd: “Xeylê kesî nê çîyê ke ma kenê sey reklam û prestîj vînenê. Sponsorê ma yê dîyarkerde çinî yê. Netîceyê parekerdişan de şar bexşan keno û ma bi wesîleya nê bexşan karê xo dewam kenê. Ma serê çapemenîya komelkî de vînenê û wazenê ke no rîyê tutan bido huwîyayîş. Çewlîg de nizdîyê 70 endamê ma estê ke tewrê xebatan benê. Zafane embazê ma yê cinîyan ra pê yeno. Ma tewr zêde paştîdayîşê embazanê xo pawenê. Çike wexto ke destê cinîyan gineno pê, hîna weş beno her çî.”