Rojda Aydin

 

ÎDIR - Îdir de vejîya raşte ke 6 camêrdî nizdîyê 4-5 aşman destdergê bi tutêke kerdî û bi zorî fuhuş bi tute dayî kerdiş. 

 

Merkezê Îdirî de vejîya raşte ke tutêke bi tecawuz û fuhuşî reyde rî bi rî menda. Semedo ke şantaj û tehdît bi tute ameyêne kerdiş tute nêeşkaya keyeyê xo rê qala qewimîyayîşî bikera. Coka ra no tehdît timî dewam kerd û 27ê êlule de tute şîye Mudirîya Polîsan ya Îdirî û qala çîyê ke aye ser ra derbaz bîyî kerd. Îfadeyê emnîyetî û dozgerîye de ame zanayîş ke 6 camêrdî nizdîyê 4-5 aşman destdergê bi tute kerdî û bi şantaj fuhuş dayî kerdiş. 

 

Tute îfadeyê xo de dana zanayîş ke hetê camêrdê bi nameyê Ferhat Angay, Onur Begeç, Vedat Gîden, Cebraîl Yildiz, Murat Altun û Alîcan Begeçî ra raştê tecawuzî ameya û derheqê kerdoxan de gerre kerda. Bado ke qewimîyayîş vejîya raşte keyeyê tute zî derheqê kerdoxan de muracat kerd. 

 

Rapor de tecawuz vejîya raşte 

 

Eynî wext de muayeneyê nêweşxaneyî de zî vejîya raşte ke tute bi tecawuzî reyde rî bi rî menda. Kerdoxî îfadeyê xo yê emnîyet û dozgerîye de tecawuz û şantajî qebul nêkerdî. Dimayê îfadeyê dozgerîye 27ê êlule de kerdoxan ra Onur Begeç, Alîcan Begeç, Vedat Gîden û Murat Altun bi sucê ‘Hêrişê cînsî yê hemverê tute’ ra ameyî tepiştiş û nê kesî şirawîyenê Dezgehê Înfazî yê Tepişte yê Tîpê Syî yê Îdirî. Kerdox Ferhat Angayî zî bi şertê kontrolê edlî serbest yeno verdayîş. Eynî wext de kerdox Cemraîl Yildizî semedo ke vînîbîyaye yo hema îfadeyê ci nêameyo girewtiş.

 

Bado ke qewimîyayîş vejîya raşte ame zanayîş ke tute girîyaya binê pawitişî.