Rabia Onver

 

COLEMÊRG - Cinîyê ke reaksîyon mojnayî hêrişanê Tirkîya yê vera Vakur û Rojhelatê Sûrîye, ardî ziwan ke wexto ke babete bena hêrişê serê kurdan o wext dinya çimanê xo gêna û wina vatî: “Her kesê wayîrê wijdan ganî vera hêrişan de reaksîyon bimojno.”

 

Anqara de dimayê çalakîya vera Mudirîya Pêroyî ya Emnîyetî vera Vakur û Rojhelatê Sûrîye de hêrişê Tirkîya pê ameyî. Bi teyareyanê şer, Teyareyê Bêmerdim û topan hêrişê serê tesîsê petrolî, ceyran û awe ame kerdiş. Sewbîna zî raşteyê xizmetê komelîkî, mekteb û nêweşxaneyî bîyî hedef. Bêvengîyê dinya yê vera hêrişan zî dewam keno. 

 

Dadîyê Şemeyî yê qezaya Geverî ya Colemêrgî, pawitoxê heqê merdiman, siyasetmedarî derheqê hêrişanê serê Vakur û Rojhelatê Sûrîyeye de qisey kerdî.

 

'Kes nê şerî nêvîneno’ 

 

Dadîya Aştîye Gulbeyaz Mihçiye hêrişê serê kurdan şermezar kerd û wina vat: “Ganî şer û merg bi lezkî peynî bibo. Sîvîl, cinî û tutî yenê qetilkerdiş. Çi heqê înan esto, kurdan herra înan ra vejenê? Qey kes nê şerî nêvîneno, qey her kes bêveng o? Dinya seba peynîardişê şerê mabenê Îsraîl û Fîlîstînî de veng vejena, seba kurdan qey veng nîno vetiş? Qey kesêk seba qirkerdişê ke yenê kerdiş vengê xo nêkeno? Ez seba her kesê wayîrê wijdan veng kena; Wa seba Rojawanî biwurzê payan ser, seba ke kes nêmiro wa wurzî payan ser.”

 

'Semedo ke kesêk nêmiro wa her kes gamêk bierzo' 

 

Dadîya Aştîye Fatma Temele da zanayîş ke her hêrişo ke yeno kerdiş zerrîya Dadîyê Aştîye dejneno û wina dewam kerd: “Xeylê kesî dinyaya xo bedilnayî. Ma heme kesê ke benê sebebê nê çîyî lanet kenê. Qey seba şerê Îsraîl û Fîlîstînî hîsgêr benê la qey seba Rojawanî bêveng manenê û nêvînenê? Bi bombe û çekê kîmyewîye hêrişê kurdan kenê. Awe û cereyan birnenê, la kesêk nê caardişan nêvîneno. Çike babeta vatişî kurd ê. Ez venga heme hemwelatijan kena; Çim û goşanê xo yê ke şima seba kurdan girewtî akerê. Seba ke no şer peynî bibo şima zî destê xo bikerê binê kerra. Seba ke kesêk nêmiro wa her kes gamêke bierzo.”

 

'Tena kurdêk zî bimano, ma fek têkoşînê xo ra vera nêdanê’ 

 

Hemsereka Partîya Demokratîke ya Şaran (HDP) Halime Sureye zî ard ziwan ke nika şerêk şîdetin qewimîyeno û wina vat: “Wexto ke babete bena kurdî her kes bêveng o. semedo ke şer vindero ganî bi lez gamêke bêro eştiş. No şerêk yew hetin o, kurdan ra çi wazenê? Her tim cayê ke tede kurd estê de şer dewam keno. Wexto ke babete bena kurdî her kes çim û goşanê xo gêno. Ganî nê şerî de her kes destê xo bido serê wijdanê xo û veng bivejo. Ganî herkes vera nê şerê ke hemverê kurdan de dîyayo destpêkerdiş rê bibo cewab. Bêvengî merg o, şima do heta key bêveng bibê? Ma vera şer û kiştişê merdiman de yê. Coka ra wa no şer vindero. Wa na gonîye vindera. Semedo ke kurdî biqedîyê şer kenê. La tena kurdêk daxî bimano ma do têkoşînê xo dewam bikerê.” 

 

'Ganî kesêk vera hêrişan de bêveng nêmano’

 

Îdarekara ÎHDyî ya Colemêrgî ra Pinar Şen Zengine zî da zanayîş ke bi şerê demê peyênan xeylê kesî tesîr bîyî û wina vat: “Nika serê Rojawanî de hêrişêk gird û zêde esto. Ganî ma sey şarê kurdî vera hêrişanê serê kurdan de bêveng nêmanê. Heqê weşîye ameyo binpaykerdiş, heqê cereyan, heqê awe destê merdiman ra ameyî girewtiş. Hêrişê hewayî û bejayî tesîrêk gird serê merdiman de kenê. La ma tena qala şarê Îsraîl û Fîlîstînî kenê. Tesîrê nê şerî yê serê tutan û cinîyan bi xof o. Semedo ke şer peynî bibo ma wazenê kurdî bibê hêzê hempar.”