Dîlan Babat

 

ANQARA - Parlamentera Partîya Çep a Keske Gulîstan Kiliç Koçyîgîte hêrişê vera Vakur û Rojhelatê Sûrîyeye û bêvengîya vera hêrişan ercnaye û vat: “Ganî hêzê koalîsyon û mîyanneteweyî vernîya bombeyan bigîrê. Kurdan vera DAIŞî de têkoşînêk gird da. Dinya deyndarê kurdan a.” 

 

1ê teşrîna verêne Anqara de hemverê wezîraya karê zerreyî de çalakîya bombeyî pê ame. Dimayê çalakîye Tirkîya de hemverê Vakur û Rojhelatê Sûrîye de hêrişî dîyayî destpêkerdiş.

 

Parlamentera Partîya Çep a Keske ya Qersî Gulîstan Kiliç Koçyîgîte derheqê hêrişê ke raşteyê cuye yenê kerdiş de ercnayîşan kerd.

 

Erdogan seba Fîlîstînî vano ‘ka merdimîye’: Rojawan de ka merdimîye

 

Gulîstane da zanayîş ke siyasetê Tirkîya dirî yo vat: “Dimayê çalakîya wezîrîya karê zerreyî hêrişê hemverê Vakur û Rojhelatê Sûrîye dest pêkerd. Bi F 16yan Rojawan de nêweşxane, tesîsê ceyranî, awbendê awe, sîloyê xeleyî, mekteb û dewî ameyî bombardumankerdiş. Dima ra Hamas hemverê Israîlî de hêriş pê ard. Uca de vera sivîlan de sucê cidî ameyî kerdiş. Bi taybetî hemverê cinîyan de. Wexto ke hêrişê Tirkîya û Israîlî anê vera yewbînan çîyêk yewbînan ra cîya çin o. La Erdogan hewl dano dersê merdimîye bido. No nîno qebulkerdiş. Erdogan seba Fîlîstînî vano ‘ka merdimîye’. Ma zî eynî çîyî persenê; Şima zî heme raşteyê cuye yê Rojawanî bombarduman kerd. Rojawan de merdimîye kam ca de yo.”

 

‘No nizdîbîyayîş nîno qebulkerdiş’

 

Gulîstane dîyar kerd ke vatişê Tirkîya yê derheqê Fîlîstînî de û hêrişê hemverê Rojawanî bêsamîmîyet o û wina dewam kerd: “AKP û Erdogan hisûmetî kenê. Yew mutefîkê herême yê gird yê Israîlî hukmatê AKPyî yo. Hem ci reyde pê keno û hem zî bazirganîye keno. Sewbîna zî verê çimanê rayaumûmîye de seba Fîlîstînî bermeno. No nizdîbîyayîşê dirî nîno qebulkerdiş.”

 

‘NY huqûqê xo nêpaweno’

 

Gulîstane ard ziwan ke Tirkîya bi heme hêzê xo destkewtişê Rojawanî hedef gêna, çalakîya Anqara kerd bahane û nê ercnayîşan kerd: “Hemverê Mexmûrî de zî hêriş pê ano. Mexmûr kampa ke binê pawitişê Neteweyê Yewbîyaye de ya. Dişmenîya AKPyî yê hemverê uca nêqedîyeno. Bi destê PDKyî ambargo herême de pê yeno. Nêverdenê merdimê uca şêrê bişuxilê, şêrê herînayîş bikerê, şêrê nêweşxane û şêrê dermanan bigîrê. Bi huqûqê dişmenîye nizdî benê. Tezkereyê ke meclîsî de ameyî kerdiş de çarçeweya NYyî de Tirkîya, Lîbya û Rojhelatê Mîyanenî de leşkerî bica kerdbî. Tirkîya hetêk ra NYyî reyde kar kena û heto bîn de zî çekan dana hêzê çekdarî yê uhdeyê NYyî de ameyî awankerdiş. Hetêk ra zî kampa ke binê pawitişê NYyî de ya bombarduman kena. NY înan nizdîbîyayîşan nêvînayîş ra yeno û huqûqê xo binpay keno. Ma Kurdî nê caardişîan qebul nêkenê. 

 

‘Hêzê mîyanteweyî seba Tirkîya çîyêk nêkenê’ 

 

Gulîstane qiseykerdişê xo yê peyênan de hêrişê hemverê Rojawanî ercnaye û vat: “Ma hêrişê hemverê Rojawanî bi ters temaşe kenê. Na rewşe raşteyê mîyanneteweyî de çîyêk îfade nêkena. Hemverê caardişê Tirkîya de çîyêk nêkenê. Cografya yena talankerdiş û OSO tede ameyo cakerdiş. La ma veng kenê ke ganî hêzê mîyanneteweyî vernîya bombardumankerdişê Rojawanî bigîrê. Sewbîna ma ewro ewnîyenê ke tay hetê kurdî seba Fîlîstînî vejîyenê raşteyan. La Rojawan yeno bombardumankerdiş û kes vengê xo nêkeno. Acaba no kurd bîyayîş o. Ganî ma vera hêrişan de bi lez wurzê payan ser.”