ANQARA - 4ine Kongreya Partîya Çep a Keske siba Anqara de yena organîzekerdiş. Amadekarîyê kongre temam bîyî. 

 

Bi sloganê "Semedê azadîye" Partîya Çep a Keske siba Kongreyê xo ya Pîl a Îstîsnayî ya 4ine do Anqara de organîze bikero. Kongre do Eywana Sporî ya Atatûrkî de bêro organîzekerdiş. 

 

Amadekarîyê kongreye zî vurnayîşê rêziknameyî û şixûlnayîşê partîye bî. Nê ser de zî amadekarî peynî bîyî û yeno pawitiş ke rêzikname bêro vurnayîş û hûmara endamê Meclisê Partîye zî bêrê kêmkerdiş. Rêziknameyî de perwerdeyê bi ziwanê dayîke û awankerdişê akademîya sîyasetî do rêziknameyî de ca bigîro. 

 

Yeno pawitiş ke bi hezaran kesî beşdarî kongreye bibê. Do partî hewt herêmê cîya yê Tirkîya otobusan amade bikero û girseyê xo biresno kongre. Yeno pawitiş ke do partî goreyê îmkanê xo nêzdîyê 10 hezar welatijan biresno kongre û na xebate hetê rêxistinê bajar û qezayan ra yeno organîzekerdiş. 

  

Çar hetê Kurdistanî û çar hetê dinya ra îdarekar û temsîlkarê sazgeh û dezgehan semedê kongre ameyî dawetkerdiş û yeno pawitiş ke xeylêk meymanî beşdar bibê. 

 

Wareyê teknîkî de zî amadekarîyê kongre peynî bîyî. Do dekewtişê eywane tenê berêk de pê bêro. Selahîyetdarê partî semedê tehlukeyê asayîşî tenê berêk akerdê û do rojnamegerî zî berêk bîn de bikewê eywane. 

 

Semedê asayîşê eywana kongreye xora 50 pawitoxê wezîfedarî estê la partî bi xo zî komêke pawitoxan ê  200 kesî ra pê yeno, amade kerda. Ame zanayîş ke nêzdîyê 20 parlamenterî û endamê Heyetê Îdarekarîya Merkezî zî semedê asayîşê kongreye ameyê wezîfedarkerdiş.