STENBOL - Keso bi nameyê A.T. Stenbol de bi hawayêkê sîstematîk desteştişê tute kerdêne. Semedê sûcê “îstîsmarê biwesfî yê hemverê tute ya bi rayîrê şîdetî” 40 serrî û 6 aşmî û semedê sûcê “Tehdîdê bi çeke” zî 4 serrî cezaya zîndanî dayî versûc A.T.yî. 

 

Keso bi nameyê A.T. Sûltanbeylî yê Stenbolî 5 serran bi hawayêkê sîstematîk desteştiş torne xo rê kerd û 7ê gulana 2022ine de ame tepiştiş. Roniştişê dewa 14ine Dadgeha Cezaya Giran ya Edliyeyê Anadoluyî ya Kartalî de ame vînayîş. Roniştiş de versûco tepişte A.T. û avûkatê hetan amade bîyî. 

 

Versûc A.T. roniştiş de pawitişê xo kerd û desteştişî înkar kerd. Goreyê raporê Sazgehê Tipê Edlî (ATK) zî delîlê desteştişî yê fîzîkî û tibbî estê. 

 

Dozgerî waşt ke versûc bêro cezakerdiş. 

 

44 serrî cezaya zîndanî dayî versûco ke desteştişê tute kerd

 

Heyetê dadgehe qerarê xo da û semedê sûcê “îstîsmarê biwesfî yê hemverê tute ya bi rayîrê şîdetî” 40 serrî û 6 aşmî û semedê sûcê “tehdîdê bi çeke” zî 4 serrî cezaya zîndanî da versûc A.T.yî.

 

‘Do tu wext destê ke nêzdîyê tutan benê bêceza nêmanê’ 

 

Avûkata tuta ke rastê desteştişî ameye Bîlgîn Unsaç dimayê qerarî wina vat: “Tutî bêgunay ê. Do destê ke nêzdîyê tutan benê bêceza nêmanê. Na dosyaye de zî destê nêzdîyê tute bîyî veşayî. Heta ke ma bibê do tu wext destê ke nêzdîyê tutan benê bêceza nêmanê.”