Rozerîn Gultekîn

 

STENBOL - Hemverfeka Partîya Çep a Keske ya Stenbolî Beser Çelîke da zanayîş ke 28ê teşrîna verêne de Stenbol de konferansê cinîyan pê anê û vat ke ê sey rêxistinê koma demokratîke azadîya fîzîkî ya Abdullah Ocalanî wazenê û vat ke do bi hawayêkê rêxistinkerde prosesî rayîr ra berê. 

 

30ê Adara 2024î de weçînayîşê herêmî pê yeno û HDP û Partîya Çep a Keske xebatê xo bê maben rayîr ra benê û heto bîn de zî konferans û komxebatan pê anê. 

 

Hemverfeka Partîya Çep a Keske ya Stenbolî Beser Çelîke derheqê prosesî de ajansê ma rê qisey kerd. Besere da zanayîş ke weçînayîşê herêmî xeylê muhîm o û rayîrberê herêmî raşteyo ke şar raşte raşt tede rolê aktîf kay keno û vat: “Prosesê verê cû de şaredarîyê ke ameyêne qezenckerdiş yewser bi şarî reyde kewtêne têkilî. Coka ra îqtîdar qeyûman tayîn kerd. Bi qeyûman waştî şarî bê îrade biverdê. Şaredarîyê qeyûmî şarî rê nêbenê cewab. Xizmet nêdanê şarî. Kesê ke tewr zêde mexdur bîyî zî cinî û tutî bî."

 

‘Polîtîkaya tecrîd û qeyûman pê anê’ 

 

Besere qiseykerdişê xo wina dewam kerd: “Îqtîdar her tim kaos û şerî ra wayîr beno. Vatişê mîlîtarîst û nizdîbîyayîşê faşîzanî çîyêk newe nîyo. Bi nê zîhnîyetî zî nizdîyê weçînayîşê herêmî benê. Serê Rayberê PKKyî Abdullah Ocalanî de tecrîdêk giran yeno rayîr ra berdiş. şarî ser de tecrîd yeno rayîr ra berdiş. Polîtîkaya tecrîd û qeyûman yena rayîr ra berdiş. Ciwanê kurdî, şarê kurdî, cinîyî bi hêrişan reyde rî bi rî manenê. Yenê tepiştiş. La no şar qet gamêke tepîya nêeşto.” 

 

Xeta More cîyayê awan kena 

 

Besere qiseykerdişê xo yê peyênan de da zanayîş ke serra 2004î ra heta nika şaredarîyan de sîstemê hemserekatîye yê xeta more ya cinîyan pê yena û wina vat: “Wexto ke temsîlkarîya têduştî nêveja raşte, serdestîya camêrdî xo dano teber. O wext cinî û ciwan zî mumkun nîyo ke xo uca de bivînê. Nê semedî ra sîstemê hemserekatîye seba ma xeylê muhîm o. HDP û Partîya Çep a Keske Sîlopî de Komxebata Polîtîkayê Cinîyan ê Rayîrberê herêmî pê ardî. Prosesê vernîya ma de do xebatê weçînayîşî dewam bikerê. 28ê teşrîna verêne de Stenbolî de do konferansê cinîyan pê bêro. 29ê aşmî de zî do têmîyan pê bêro. Hedefê ma no yo ke ma sîyasetê rayîrê hîrêne û têkoşînê hemparî gird bikerê. Ez venga têkoşînê hampar bi heme hetanê demokratîkan kena.”