MERKEZÊ XEBERAN - EŞÎKî dîyar kerd ke ganî hewteyê peyîn de Rojawan û Gazzeyî de cayê lazimîyê cuye yê seke nêweşxane, awe, ceyran ci de yenê bombabvarankerdiş û vat: "Mazeretê şîdetî yê hemverê sîvîl, cinî û tutan çin o."

 

Platformê Cinîyan ê seba têduştî (EŞÎK), bi sernameyê "Ma fek heqê xo yê cuye yê bê şer, bê şîdet vera nêdanê" serê hesabê xo yê medyaya dîjîtale de eşkerayîye da. Eşkerayîye de cinîyan vat, ê şer baş zanê û vatî: "Ma nêwazenê nê şerî bimusê û bi nê xofî biciwîyê."

 

'Ma nêwazenê nê şerî bimusê û bi nê xofî biciwîyê'

 

Eşkerayîye de cinîyan da zanayîş ke Rojhelatê Mîyanên de şer û pêrodayîşî reyna zêde bîyê û wina vatî: "Rojawan û Gazzeyî de cayê lazimîyê cuye yê sey nêweşxane, awe, ceyran ci de yê, yenê bombavarankerdiş. Mazeretê şîdetî yê hemverê sîvîl, cinî û tutan çin o. Xidayî yenê astengkerdiş. Şîdet cinî û tutan rê yeno kerdiş. Merdimî mecbûrî koçberî yenê kerdiş.”

 

Eşkerayîye de cinîyan da zanayîş ke ganî hemverê  şerê ke beden û keda cinîyan seke xanîmetêk yeno vînayîş, peynî bibo û vatî, ganî her kes tezkereyê îşxalkerdişî rê vajo nê.

 

Sewbîna cinîyan dayî zanayîş ke semedê cuyêka bi asayîş, semedê azadîya pêro kesî, semedê aştîyêke mende ê polîtîkayêke femînîst ê teberî wazenê û vatî, şer û şîdetî rê nê, wa aştîye ganî bêra.