ANQARA - Verfeka Meclîsê Cinîyan a Partîya Çep a Keske Canan Çalagane dîyar kerd ke wazenê îradeyê cinîyanê ke Dewaya Kobanê de vera çeteyanê DAIŞî şer kerdî muhakeme bikerê. Canane venga cinîyan kerd ke wayîrê dewaye bivejê û tewrê roniştişan bibê. 

 

Verfeka Meclîsê Cinîyan a Partîya Çep a Keske Canan Çalagane kombîyayîşê çapemenîye yê awanîya Merkezê Pêroyî yê Partîya Demokratîke ya Şaran (HDP) de serê Dewaya Kobanê de ercnayîş kerd. 

 

Canane qiseykerdişê xo de bale ant serê Dewaya Kobanê û vat: “Bi îdîayanê zure û îfadeyê şahidanê nimiteyan Dewaya Kobanê viraştî û na dewa hema zî dewam kena. Dewaye sero ra 6 serr û 3 aşme derbaz bî, roja destpêkerdişê dewaye ra heta nika kumpasêk estbî. Dewaya ke bi destê muhakemeyê camêrdî yê serdestî ra yena rayîr ra berdiş, bi bahaneyan bedilnayîşê heyetê mehkema û dozgerîye dewam kena. Bi talîmatê îqtîdarî û bi destê muhakemeya camêrdî kumpasêk ame prganîzekerdiş û 108 embazê ma buhuqûqî yenê muhakemekerdiş. Derheqê embazanê ma yê cinîyan de delîlêk somut çin o. Dewaya Kobanê ya Kumpasî û seba girewtişê dewaya HDPyî bahane mojnenê.”

 

Canane eşkera kerd ke Dewaya Kobanê de tena 108 kesî hedef nêameyî girewtiş, îradeyê cinîya ke vera DAIŞî de xover da zî ame hedef girewtiş û wina dewam kerd: “Rojawan de bi serkêşîya cinîyan cuyêka newe ameye awankerdiş. Çîyo ke yeno muhakemekerdiş destkewtişê cinî û şarê kurdî yo. Ma bi desan reyna ard ziwan û ma do bîyarê ziwan. Vera DAIŞo ke cinîyan ganî tepişt û bazaran de vet rotişî xoverdayîşêk pê ame û paştîdayîşê nê xoverdayîşî suc nîyo. Bêvengîya hemverê sucî suc o. embazê ma yê ke zîndanan de yenê tepiştiş emrê xo seba têkoşînê azadîya cinîyan feda kerdî. Têkoşînê vera şîdet û qetilkerdişê cinîyan de qet gamêke tepîya nêeştî. Seba sucdarkerdişê embazanê ma 3 hezar û 500 rîpel îdîanameyêk ame hadrekerdiş. Her vatişê ke îdîanameyî de ca gênê serê dişmentîya cinîye de ameyî awankerdiş. Embazê ma pawitişê xo de sîstemê serdestî yê camêrdî û heyetê mehkema muhakeme kerd.”

 

Canane qiseykerdişê xo wina peynî kerd: “Ma yewna reye vanê; ma qet fek têkoşînê xo ra vera nêdanê. Fîgen, Gultan, Sebahat, Ayla û embazê ma yê bînî bi îradeyê xo rayîrê têkoşînê azadîya cinîye roşn kenê. Bi na bawerîye ma vanê; ma seba ke bibê vengê embazanê xo, paştîdayîşî gird bikerê û xoverdayîşî gird bikerê. Wayîrê dewaye bivejê û tewrê roniştişan bibê.”