MERKEZÊ XEERAN - Hevrîn Xelefe 4 serrî verê cû hetê çeteyanê ‘Ehrar El Şerqiye’ ke Tirkîya paştî dayêne înan ra ameye qetilkerdiş. Qetilkerdişê Hevrîne ra 4 serrî derbaz bî. Embazê aye do têkoşînê Hevrîne dewam bikerî. 

 

 19ê Temmuza 2012yî de Şorişê Rojawanî pê ame û vera sîstemê kapîtalîstî yê netew dewletî de sîstemêk alternatîf vejîya raşte. Bi perspektîfê netewê demokratîke yê paradîgmaya azadîwaştoxe ya cinîye ya ekolojîk û demokratîk ê Rayberê PKKyî Abdullah Ocalanî reyde gam bi game sîstem ame awankerdiş û seba şaran bî hêvî. 

 

Cinîyan prosesê şorişî û prosesê cuya neweyî de rolêk muhîm kay kerdî û şorişê Rojawanî eynî wext de sey şorişê cinîye zî yeno bi name kerdiş. Şorişê Rojawanî ke heme Bakur û Rojhelatê Sûrîye de vila bî, seba heme cinîyanê dinya bî îlham. 

 

Bi şorişê Rojawanî reyde yew nimuneyê tewr muhîm Hevrîn Xelefe her raşteyê cuye de cinîyan rêxistin kerd û bî nimune ke cinî eşkenê bibê serkêşe. 

 

Bi şorişî reyde cinîyê ke têkoşînê azadîye û cinîyan rê awankerdişê cuya neweyî de serkêşîye kerdêne, bîyî hedef. Hewldayîşê Tirkîya yê hemverê çinîkerdişê destkewtişê şorişî aye roje ra nata dewam keno. Hêrişanê înan de Hevrîn Xelefe ameye qetilkerdiş. 

 

Hevrîn Xelefe kam a? Hevrîn Xelefe 12ê teşrîna verêne ya 2019î de serê rayîrê M4î de hetê komê girêdayeyê dewleta tirke ra bi hovî ameye qetilkerdiş. Hevrîn Xelefe Endama Heyetê Sekretera Pêroyî ya Partîya Sûrîyeya Ameyoxî ya Sûrîye bî. Hevrîn Xelefe serra 1983yî de bajarê Dêrikî de mîyanê keyeyêk welatperwer de ameye dinya 

 

Hevrîne mektebê xo yê sereyî, amadekarî û mîyanenî mektebanê bajarê Dêrikî de wend. Hevrîne dimayê wendişê xo yê unîversîteye yê beşê muhendîsîya zîretî derbazê bajarê Helebî bî. Hevrîne bi dest pêkerdişê şorişê Rojawanî reyde 19ê Temmuza 2012î de bi hawayêkê aktîf tewrê şorişî bî. Hevrîne demêk kilm bajarê Qamişlo de wezîfeyê rayîrberîya encumena ekonomîye kerd. Hevrîn Xelefa ke bi hawayêkê aktîf mîyanê kar û xebatan de ca girewtêne hetê komê girêdayeyê Tirk

Dimayê qetilkerdişê Hevrîne embazêke aye qalê Hevrîne kerd û dîyar kerd ke şorişê cinîye xeyalê Hevrîne bî û vat: “Coka ra zî bi bawerîyêke gird xebetan de ca girewtêne û bi taybetî zî mîyanê xebatê şarê Erebî de ca girewtêne. Kulturê netewê demokratîke bi ma daye naskerdiş û felsefeya cuya azade bi ma reyde pare kerd.” 

 

 Nameyê aye Fransa de dîya raşteyêk 

 

 Xebat û tesîrê Hevrîne tena bi Bakur û Rojhelatê Sûrîyeye sînor nêmend. Dimayê qetilkerdişê Hevrîne nameyê aye bajarê Lyon yê Fransa de dîya raşteyêk taxa Guîllotîerî. 

 

Tirkîya dîploma da kiştoxî 

 

Têkoşîno ke Hevrîne seba şaran û cinîyan da tesîrêk gird dinya de kerd. Tirkîya senî ke bi destê komê ke paştîdayîş dayêne înan Hevrîne qetil kerd, seba pawitişê kiştoxî zî hewldayîşê xo dewam kerd. Kiştox Ebû Şeqra unîversîteya Artuklu ya Mêrdînî ra mezun bî û dîplome girewt. 

 

 Têkoşînê Hevrîne dewam keno 

 

 Hevrîn Xelefe 4 serrî verê cû hetê çeteyanê ‘Ehrar El Şerqiye’ ke Tirkîya paştî dayêne înan ra ameye qetilkerdiş. Qetilkerdişê Hevrîne ra 4 serrî derbaz bî. Mîyanê nê 4 serran de hêrişê Tirkîya yê vera Bakur û Rojhelatê Sûrîye dewam kenê. Vera heme hêrişan têkoşîn bêmaben dewam keno. Cinîyî her ca de wayîrê têkoşînê Hevrîne vejîyenê û hetê pawitişê destkewtişanê şorişî de bi isirar ê. Embazê aye do têkoşînê Hevrîne dewam bikerê.