Mîdye Miqted

 

HELEB - Cinîyê Helebî bale antî serê muhîmî û taybetmendîya Jineolojîye ser û wina vat: “Her ke ma xo û xebata xo aver bifînê û ma mîyanê komelî de vila bikerê, hende ma do bieşkê azadîya Rayber Abdullah Ocalanî meşru bikerê. Ma heme raşteyê Jineolojîye bidê naskerdiş. Ma bi Jineolojîye reyde stratejîyêk xurt awan bikerê. Ma wina bikerê, ma do bieşkê azadîya Rayberî zî meşru bikerê.” 

 

Nika tecrîdo giran ê serê Rayberê PKKyî Abdullah Ocalanî dewam keno. Abdullah Ocalan Zîndanê Îmraliyî yê Tîpê Fyî yê Asayîşo Berz de yeno tepiştiş û 31 aşmî yo ke ci ra tu xeberêke nîna girewtiş. Avûkat û keyeyî muracatê Serdozgerîya Komare ya Bursa û Mudirîya Zîndanî yê Îmraliyî kenê. Avûkat û keyeyî seba pêvînayîşê bi Omer Hayrî Konar, Hamîlî Yildirim û Veysî Aktaşî reyde muracatê dozgerîye û hem zî muracatê mudirîya zîndanî kenê. La çi heyfo ke bi bahaneyê tewşan û vengan pêvînayîş yeno astengkerdiş. 

 

Abdullah Ocalan bi fikr û felsefeya xo ya dinya, dêsê nê tecrîdo giran şikneno û awankerdoxê Şorişê Rojawanî ra yew o. Nika Rojawan de sîstemê têduştî û demokratîke esto. Bi Rayîrberîya Xosere reyde xeylê destkewtişî seba heme pêameyoxê Vakur û Rojhelatê Sûrîye yenê destfînayîş. Yew destkewtişê gird zî kar û xebatê raşteyê Jineolojîye de yê. 

 

Dimayê şorişê 19ê Temmuze xeylê destkewtişî ameyî destfînayîş. Dimayê awanbîyayîşê Rayîrberîya Xosere ke şar xo bi xo rayî ra beno, çalakî, kar û xebatê hetê Jineolojîye zî pê ameyî. Cinîyê ke Heleb de ciwîyenê û raşteyê Jineolojîye de kedêk gird danê derheqê muhîmîya Jineolojî û xebatan de qisey kerdî.

 

'Jineolojî aver kewt û şûbeyê ci ameyî akerdiş’

 

Endama Merkezê Cigêrayîşê Jineolojîye yê bajarê Helebê Rojîyan Hisêne derheqê kar û xebatê Jineolojîye û averşîyayîşê aye de wina vat: “Ma ewro seserra 21ine de ciwîyenê. Sey seserra azadî û averşîyayîşê cinîyan yena namekerdiş. Tîya de avervejîyayîşê sosyolojîya azadîye muhîm a. Bi pêşnîyazê Rayber Abdullah Ocalanî zanistê Jineolojîye ameye averberdiş. Vakur û Rojhelatê Sûrîye de xeylê merkezê Jineolojîye ameyî akerdiş. Bajarê Helebê de zî no bî hîrê şûbeyî ke yenê akerdiş.”

 

'Ma bi problemê cinî û komelî reyde meşgul benê’

 

Rojîyane da zanayîş ke ê bi problemê cinî û komelî reyde meşgul benê û wina dewam kerd: “Merkezê ma de tewr zêde cigêrayîş, semîner û komxebatî yenê viraştiş. No zî problemê cinî û komelî ser de yo. Nê çîyî do senî aver bikewê û do senî bêrê çareserkerdiş. Nê çîyan ser de yeno vindertiş. Ma bi problemê cinî û komelî reyde meşgul benê, semedo ke azadîya cinîyan bi azadîya komelî girêdayeya. Rayîrberî zî vano azadîya komelî bi azadîya cinîyan reyde meşru bena û nê esasan ser de xebatê ma aver şinê. Ma serê perspektîfê Rayîrberîye de xebata xo aver benê.”

 

Raşteyê Jineolojîye de averşîyayîşê camêrdî 

 

Rojîyane derheqê averşîyayîşo ke ewro xebata înan de virazîyayo û bîyayîşê temsîlkarê camêrdî ê xebatanê înan de wina vat: “Dimayê awankerdişê temsîlkaranê cinî yê heme meclîs û dezgehan de sey Jineolojîye ma waşt ke ma gamêke newe bierzê. No zî awankerdişê temsîlkarê camêrdî yê xebata Jineolojîye de bî. No zî goreyê perspektîfê Rayber Abdullah Ocalanî yo. Bi taybetî cigêrayîşê hemcuya azade de ma serê; senî rolê camêrdî aktîf bikerê de vindenê. Çike ganî camêrd fikrê seba hemcuya azade qezenc bikero. Do camêrd senî bibo sebebê keyeyêk azade? Coka ra cinî û camêrdî pîya Jineolojîye de xebetîyenê. Camêrdî perwerdeyan vînenê. Problemê cinî û komelî ser de munaqaşayanê hîrayan kenê. Heleb de zî tewr peynî cigêrayîşê derheqê xoverdayîşê Şêxmeqsûdî aver keweno û tay babetî peynî bîyî. Babetêke derheqê cinîyê wextê şerê Şêxmeqsûdî de ya. Sewbîna babetêke derheqê tarîxê Helebî yê Şorişê Rojawanî ra ver û dimayê ci ya. Bi taybetî tîya de serê rolê cinîyan yê awankerdişê bajarê Helebî ser de yeno vindertiş.”

 

‘Jineolojî destkewtişêk gird ê fikrê Abdullah Ocalanî ya' 

 

Rojîyane dewamê qiseykerdişê xo de dîyar kerd ke bi rayîrê averşîyayîşê xebata înan do azadîya Rayberê PKKyî Abdullah Ocalanî meşru bibo û vat: “Her ke ma xo û xebata xo aver bifînê û ma mîyanê komelî de vila bikerê, hende ma do bieşkê azadîya Rayber Abdullah Ocalanî meşru bikerê. Ma heme raşteyê Jineolojîye bidê naskerdiş. Ma bi Jineolojîye reyde stratejîyêk xurt awan bikerê. Ma wina bikerê, ma do bieşkê azadîya Rayberî zî meşru bikerê.”

 

'Ma bi hêzê aqil probleman çareser kenê' 

 

Sewbîna Verfeka Merkezê Cigêrayîşê Jineolojîye ya bajarê Helebî Yesmîn Mihemede zî ajansê ma rê ercnayîş kerd û xebatê Jineolojîye yê ke serê esasê fikrê Abdullah Ocalanî de ameya awankerdişî, kerd û vat: “Kitabê Rayberê Şarê Kurdî Abdullah Ocalanî bi taybetî yê sosyolojîya azadîye tewr zêde serê problemê komelkî, qanûn, exlaqî de yeno vindertiş. Çareserîya seba nê probleman ano ziwan ser. Eynî wext de pêşnîyarê zanistê Jineolojîye hetê Rayber Abdullah Ocalanî ra yeno kerdiş. Mexmûr de zî serê na babete de munaqaşeyî ameyî kerdiş. Merkezê cigêrayîşî Tebqa, Minbic, Şehba û Helebî de ameyî akerdiş. Ma zî bi wesîleya merkezê ma, hêzê aqil danê aver û aver benê. Probleman bi no hawa çareser kenê. Ma xo qaliban ra durî fînenê.”

 

'Bi rayîrê projeyê neteweyê demokratîk cinîyan yewbînan ko kerd’

 

Peynîya qiseykerdişê xo de Yesmîne bale ant serê dewamkerdişê xebatê Jineolojîya serê bingehê fehmê Rayberê PKKyî Abdullah Ocalanî û nê çî vat: "Her çiqas xebata ma aver şêra zî la tewr zêde eke ma fikr û fehmê Rayberî ci de nêdê vernî û aver nêberê, êdî no zanist do aver nêşêro. Her ke ma xebata xo pêro milan de bidê vernî hende ma do bieşkê azadîya Rayberê xo yê fîzîkî mîsoger bikerê. Bi xêrê fehmê Rayber Abdullah Ocalanî, netewa demokratîke pêro cinîyan yewbînan ko kerd. Seba ke pêro dinya hewl dano ke fikrê netewê demokratîke werte ra wedarno. Ma zî hemverê nê de zêdeyêr têkoşînê xo danê vernî.”