Nazlican Nûjîn Yildiz

 

ÎZMÎR - Cinîyan bale ant serê hêrişê hemverê destkewtişê cinîyan ke bi akerdişê meclîsî reyde zêde bîyî û dîyar kerdî ke do vera hêrişan de rêxistinbîyayîşê cinîyan meclîs û raşteyan de dewam bikerê. Cinîyan sewbîna vat: “Ma do vatişê xo her ca de bikerê yew. Ma do têkoşînê xo dewam bikerê.” 

 

1ê teşrîna verêne de meclîs abî û bi akerdişî reyde waştişê desturêk bingeyîn yê newe hetê AKP-MHPyî ra fînîya rojeve. Serekomar Tayyîp Edogan qiseykerdişê xo yê akerdişî yê meclîsî de venga paştîdayîşî seba desturê bingeyîn ê newe bi partîyan kerd. Tayyîp Erdogan qiseykerdişê xo de vat ke wazenê desturêk bingeyîn ê newe virazê. Dimayê weçînayîşan, Huda Par û Yenîden Refah ke paştîdayîş dabî tifaqê AKP-MHPyî hêrişê destkewtişê cinîyan kerdbî û no bîbî sebebê reaksîyonanê cinîyan. Serra newe ya meclîsî de wina asîyeno ke nê partîyî do reyna hêrişê destkewtişê cinîyan bikerê. 

 

‘Hêrişî dimayê weçînayîşan şîdetin bî’ 

 

Endama Paştîdayîşê Morî Dîdar Gule dîyar kerd ke demêk dergo ke hêrişê îqtîdarîya AKP-MHPyî yê vera cinîyan munaqaşa kenê û vat: “Hêrişî dimayê weçînayîşan giran bîyî. Îqtîdar tîfaqo ke bi Huda Par û Yenîden Refahî reyde kerd, qanûnê hûmara 6284î kerd babeta bazarî û çim verdayî destkewtişê cinîyan. Bi serran o hemverê destkewtişê cinîyan de hêriş esto. Ma nimuneyê tewr şênber feshkerdişê Peymana Stenbolî de dî. Nika zî qanûnê 6284î kenê babeta bazarî. Prosesê nika de wezîfeyê cîyayan danê vernîya têgêrayîşê cinîyan. Têgêrayîşê cinîyan ganî nika vera hêrişan de raşte, taxe û meclîsî de xo bîyaye bikero û rêxistinbîyayîşê xo bikero.” 

 

Meclîs û raşteyan de rêxistinbîyayîş 

 

Dîdare da zanayîş ke kampanyaya bi nameyê ‘Ti tena nîya paştîdayîşê morî esta’ rêxistin kerdî û wina dewam kerd: “Bi prosesê weçînayîşan reyde û hêrişê AKP-MHPyî reyde ganî ma seba destkewtişanê xo têkoşîn bikerê û ma seba pawitişê heq, cuye û destkewtişan venga têkoşînî bi cinîyan kerd. Ma rojanê muhîman ra derbaz benê. Cinîyî seba rêxistine rojê muhîman ra derbaz benê. Ewro babeta rêxistinbîyayîşî tercîhî ra wetêr şeklê cuye ya. Ewro rêxistinbîyayîş ferz o. Vernîya ma de babeta rêxistinbîyayîşî ya şarê kurdî esta. Mîrasê têkoşînî yo ke cinîyan heta ewro ardo, esto. Ganî ma cinîyî pîya rayîr ra şêrê û xo rêxistin bikerê.”

 

‘Qanûnê 6284î munaqaşayî rê ame akerdiş’ 

 

Cinîyê Keyeyê Şarî ra Emîne Akbabaye zî bale ant serê hedefgirewtişê destkewtişê cinîyan û vat ke weçînayîşan de destkewtişê cinîyan kerdî babeta bazarî û wina vat: “Dimayê weçînayîşan hemverê,LGBTÎyan de hêriş zêde bî. Heqê nefeqeyî reyna kewt rojeve. Qanûnê hûmara 6284î munaqaşayî rê ame akerdiş. Bi nê projeyî reyde mektebê tutanê kênayan reyna ame rojev. Îqtîdarê AKPyî wazeno heqê cinîyan xesp bikero. La vera nê de cinîyî têkoşînêk cidî rayîr ra benê. Vera xespkerdişê destkewtişan de têkoşînêk zaf gird esto. Ma do vera şîdetê camêrdî yê îqtîdarîya AKP-MHPyî de têkoşîn bikerê. Nê semedî ra şima se munaqaşa bikerî zî ma do berê meclîsî şima rê teng bikerê.” 

 

‘Parlamenterê cinî vengê cinîyan benê meclîs‘

 

Emîneye qiseykerdişê xo yê peyênan de ard ziwan ke têkoşîno ke heta ewro ameyo de parlamenterê cinî yê ke ameyî weçînayîş, vengê cinîyan meclîs de dayî eşnawitiş û wina qiseykerdişê xo peynî kerd: “Seba Peymana Stenbolî vatî ma qerardar ê û fek peymane ra nêverdenê. Ma yewbînan ra nêbenê. Ma do vera tepiştişê parlamenterê cinîye de zî têkoşîn bikerê û bibê yew.”