MERKEZÊ XEBERAN - Hemverê hêrişê dewleta tirkan ê serê Vakur û Rojhelatê Sûrîye de sewîyeya mîyanneteweyî de kampanyayêke îmzayan ameye destpêkerdiş.

 

Kampanya îmzayan bi serkêşîya 'Platformê Dîplomasîyê Komelî yê Vakur û Rojhelatê Sûrîye' ame destpêkerdiş û xeylêk welatan ra rêxistinê komelî yê sivîl û demokratîkî hemkarî ci reyde kenê.

 

Kampanya bi sloganê, ‘Venga lezgînî ya çalakî: Hemverê şerê vera merdimayî yê serê Vakur û Rojhelatê Sûrîye wurze' 7ê Teşrîna Verêne de ameye destpêkerdiş. Seba kampanyaye metnê bi ziwanê îngilîzî, spanî û portekîzî ameyî amadekerdiş.

 

Metnê kampanyaye de venga hêz û dezgehê mîyanneteweyî ame kerdiş ke verê hêrişan de wurzê û bi lez game bierzê.

 

Çarçewaya îmzeyê kolektîfî yê kampanyaye de 34 rêxistinî, tevger û dezgehê heqê merdiman ê welatê Spanya, Brezîlya, Meksîka, Şîlî, Kolombiya, Hindistan, Çîn, DYE, Elmanya, Îngilistan û Iraqî tewr bîyî. Îmzayê şexsî zî zêde benê.

 

Goreyê agahîyê 'Platformê Dîplomasîya Komelî ya Vakur û Rojhelatê Sûrîye' ameyî girewtiş, wextê peynîbîyayîşê kampanyaye nêameyo dîyarkerdiş.

 

Îmzeyê ke bêrê arêdayîş do dima ra Neteweyê Yewbîyayeyî, Dîwanê Edaletî yê Mîyanneteweyî yê Laheyî û dezgehê bînî yê mîyanneteweyî rê bêrê şirawitiş.