AMED - Aktîvîsta TJAye Nesîbe Uygune dîyar kerd ke bi kampanyaya ke TJAye startê ci daya do heme raşteyan de xo rêxistin bikerê û vat: “Bi na kampanyaye do cinî xeylê çîyî ser bifînê. Do seserra 21ine biba seserran cinîye.” 

 

Tevgerê Cinîyanê Azadan (TJA) bi sloganê ‘Bi jin jiyan azadî reyde ver bi azadîye ra’ Riha, Stenbol û Şirnex de startê kampanyaye da û do kampanya heta 8ê Adare Roja Cinîyanê Dinya dewam bikera. Çarçeweya kampanyaye de do heme taxe û dewan de xebate bêra rayîr ra berdiş û vera her tewirê şîdet û polîtîkayê şerî de rêxistinbîyayîş bêro kerdiş. 

 

Aktîvîsta TJAye Nesîbe Uygune dîyar kerd ke bi kampanyaye do destê xo bidî xeylê cinîyan û derheqê mîyanen û amacê kampanyaye de ercnayîş kerd. 

 

Xoverdayîşê cinîyan bi têkoşînî gird beno 

 

Nesîbeye da zanayîş ke demê peyêna de zextê vera têkoşînê cinîye resayo merheleya tewr cor û vera nê caardişan de reyna zî têkoşîn de ca gênê û wina vat: “Cinî bi xoverdayîşêk gird têkoşîn kenê. Hetê Kurdan de têkoşînêk ke seserrî yo yeno dayîş, esto. La ma têkoşînê 10 serrê peyênan ra ewnîyenê, cinîyê ke verê cû nêeşkayêne keye ra bivejê bi têgêrayîşê azadîye reyde cinî vejîya raşteyan û têkoşîn de ca girewtî.” 

 

Nesîbeye qiseykerdişê xo wina dewam kerd: “Vera têkoşîno ke yeno dayîş de tedaya sîstemî vejîyena raşte. Destdergê û tacîzê vera cinîyan vejîya merheleya tewr cor. Feshkerdişê Peymana Stenbolî, eşkerayîyê Dîyanetî. Bi înan reyde teda xo mojna. Çend roje verê cû Wan de 6 çawişê pisporî tacîzê 2 cinîyan kerdî. No teda tena Wan de nê her ca de yeno ciwîyayîş. Fuhuş, tîryak, rayîrravetiş vejîyenê aver. Na teda bîya sebebê vejîyayîşê na kampanyaye. Xebatê ma bi şîarê ‘rêxistinbîyayîş û azadbîyayîş’ bireso merheleya teşîrkerdişê polîtîkayê şerê taybetî.”

 

Xebatê ma do dewam bikerê 

 

Nesîbe dîyar kerd ke çarçewaya xebatanê xo de do keye, kuçe û dewan de xebatan bikerê û wina vat: “Ma seserra 21ine de yê. Ma bi serran o têkoşînê cinî de yê. Bêtêduştîya komelî problemo tewr pîl o. Ma do her ca de hemverê nê de kombîyayîşê xo bikerê û xo biresnê pêro cinîyan û hişmendî awan bikerê. Ma do cuya kolektîf bimunê.”

 

‘Ma do wayîrê kampanyaye vejîyê’ 

 

Nesîbe dîyar kerd ke do bi kampanya ke dayê destpêkerdiş seserra 21ine bikerê seserra cinî û wina qedêna: “Dewlete nê zana û seba nê zî bi hawayêkê sistematik şîdet kena. Seba nê zî ganî ma wayîrê kampanya vejîyê û rêxistinbîyayîş xurt bikerê.”