Mîdye Mîqted

 

HELEB - Bi wesîleya serrgêra yewine ya qetilkerdişê rojnamegere, nuştoxe, Endama Merkezê Cigêrayîşê Jineolojîye Nagîhan Akarsele Keyeyê Wendişî reya yewine Heleb de ame akerdiş. Cinîyan derheqê babete de dîyar kerd ke înan seba caardişê xeyalê Nagîhane Keyeyê Wendişî akerdî û do tîya de çalakîyê cîya cîyayan pê bîyarî. 

 

Rojnamegere, nuştoxe, Endama Merkezê Cigêrayîşê Jineolojîye Nagîhan Akarsele 4ê Teşrîna Verêne ya 2022yî de bajarê Silêmanîye yê Başûrê Kurdistanî de verê keyeyê xo de bi hemkarîya dewleta tirkan û PDKyî ameye qetilkerdiş. Bi wesîleya serrgêra yewine ya qetilkerdişê rojnamegere, nuştoxe, endama Merkezê Cigêrayîşê Jineolojîye Nagîhan Akarsele Keyeyê Wendişî reya yewine Heleb de ame akerdiş. Cinîyan derheqê babete de hîssanê xo ardî ziwan. 

 

Nizdîyê 3 aşmî yo amadekarî yeno kerdiş 

 

Serê nameyê Endama Merkezê Cigêrayîşê Jineolojîye ya Taxa Şêxmeqsûdî Rojiyan Hisêne akerdişê Keyeyê Wendişî de qisey kerd û vat: “Ma akerdişê Keyeyê Wendişî ya bi nameyê şehîd Nagîhan Akarsele dîyarîya şehîd Nagîhane kenê û şexsîyetê aye de ma heme şehîdanê ke rayîrê azadîya cinîye de bîyî şehîd yad kenê. Ma Keyeyê Wendişî bi serkêşîya Merkezê Cigêrayîşê Jineolojîye ya Pêroyî akerd û nizdîyê 3 aşmî yo ke amadekarî yeno kerdiş. Do xebatê tîya çarçeweya cigêrayîş, wendiş û averberdişî de bêrê kerdiş.” 

 

Seba caardişê xeyalê Nagîhane Keyeyê Wendişî ame akerdiş 

 

Rojiyane dewamê qiseykerdişê xo de derheqê muhîmîya akerdişê Keyeyê Wendişî de wina vat: “Akerdişê Keyeyê Wendişî de ma waşt ke cinî xo aver biba. Seba caardişê xeyalê Nagîhane Keyeyê Wendişî ame akerdiş. Do aktîvîteyê cîya cîyayî Keyeyê Wendişî de bêrê kerdiş.”

 

 'Seba keda Nagîhan Akarsele no keye ame akerdiş’ 

 

Sewbîna Endama Merkezê Cigêrayîşê Jineolojîye ya Herêma Efrîn û Şehbaye Şêrîn Hesene qisey kerd û aye zî da zanayîş ke seba keda Nagîhan Akarsele no keye ame akerdiş û wina dewam kerd: “Yew serrî şehadetê şehîd Nagîhane sero ra derbaz bî. Ma zî şexsê Nagîhane de heme şehîdanê dewaya azadîye yad kenê û bedenê xo hemverê înan de tewênenê. Seba ke ma wayîrê ked û têkoşînê Nagîhane bivejê, ma waşt ke ma Keyeyê Wendişî Heleb de abikerê. No Keyeyê Wendişî yê diyîne yo, ê yewine zî Silmanîyê de ame akerdiş.”

 

 'Şexsê şehîd Nagîhane de waştî îdareyê cinîya zanaye çinî bikerê’ 

 

Dewamê qiseykerdişê xo de Şêrîne dîyar kerd ke dewleta tirkan seba ke îdareyê cinîya zanaye çinî bikera Nagîhan Akarsele kerd hedef û wina vat: "Şehîd Nagîhane bi destê ajanan ameye şehîdkerdiş. Waştî şexsê Nagîhane de, zanist û îradeyê cinîya zanaye çinî bikerî la çend biwazê zî îradeyê cinîyan hedef bigîrê zî do waştişê înan pê nêro. Çike ma hêzê xo şehîdanê xo ra gênê û heta ke komel bireso merheleya zanist û roşnvîrî ma do xover bidê.”