Melîke Aydin

 

ÎZMÎR - Hemsereka ÎHDyî ya Îzmîrî Zîlan Gumuşe derheqê binpaykerdişê heqan yê zîndanan û rewşa tepişteyê nêweşî de qisey kerd û da zanayîş ke vera nê caardişan de bêvengîyêke gird esta û vat ke ganî no ters û bêvengî bêrê şikitiş. 

 

Tepişteyo bi nameyê Yilmaz Ozalî ke zîndanê Tîpê Tyî yê Hûmara Yewine yê Şakranî yê Îzmîrî de tepişte yo, 5ê tebaxe de krîzê zerrî derbaz kerd. Yilmazo ke wedarîya nêweşxaneyê cigêrayîş û perwerdeyî yê Çîglî nêweşxane de dinyaya xo bedilna. Yilmazî 1ê Çeleyê 2022yî de sucê heqeretê serekomarî kerdo ameybî tepiştiş û yew serr û 7 aşme ceza ci rê ameybî birnayîş. Yilmaz aşma Nîsane de zî krîzê zerrî derbaz kerdbî û 2 rojî ra dima tepîya erşawîyabî zîndan. Bi bahaneyê tehlîyeyê ci rê demêk kilm mendo dermankerdişê ci ame redkerdiş û 5ê tebaxe de semedo ke rewşa ci giran bî wedarîya nêweşxane û 58 rojan beşê ciewnayîşê giranî de mend û dima ra dinyaya xo bedilna. 

 

Seba Yilmaz û keyeyê ci ÎHDyê Îzmîrî têkoşînê huqûqî dewam keno. Hemsereka ÎHDyî ya Îzmîrî Zîlan Gumuşe derheqê binpaykerdişê heqan yê zîndanan û rewşa tepişteyê nêweşî de qisey kerd û vat Yilmaz şertê zîndanî vera nêameyo dermankerdiş û coka ra zî dinyaya xo bedilnayo. Zîlane ard ziwan ke zîndan tena raporê ATKyî esas gêno û vat tîya de bêvengîya komelî ya vera binpaykerdişê heqan esta.

 

Zîlane da zanayîş ke Yilmaz wexto ke yeno tepiştiş tu problemê ci çinî bî û wina vat: “Zîndan de şertê giranî ra nêweş keweno. Wexto ke ewil wedarîyeno nêweşxane keye wazeno ke ci bivîno la vanê ke ganî dozgerî û rayîrberîya zîndanî ra destur bigîrê. Reya yewine bi kelepçe odaya nêweşxaneyî de yeno tepiştiş. Hişê ci sereyê ci de nêbî. La reyna zî bi kelepçe yeno girewtiş. Ma derheqê nê caardişî de muracat kerd. La vatî seba taloqkerdişê cezaye ganî ATK rapor bido. Yewine mercî tena ATK yo.” 

 

Zîlane qiseykerdişê xo wina dewam kerd: “Keye seba pêvînayîşî muracat keno. Rewşa normal de keye ganî hewte de reyêk tepişteyê nêweş yê beşê giranî de bivînê. La vera înfaz ame taloqkerdiş zî ma mecbur mendê ke dozgerîye ra destur bigîrê." 

 

‘Ganî tena raporê ATKyî verê çiman de nêgîrê’ 

 

Zîlane da zanayîş ke heme welat binê tecrîdî de yo û tepişte heme heqanê xo ra bêparê û wina vat: “Her çend ke tepişteyê nêweş nêeşkê tena sereyê xo cuya xo îdame bikerê zî ATK raporê eşkeno tepişte bimano dano. Rewşa tepişteyê nêweş bi tedbîranê asanan eşkena bêra başkerdiş. La bi polîtîkaya ke dewlete taqîp kena no çî mumkun nîyo. Tena raporê ATKyî esas yeno girewtiş. Raporê nêweşxaneyan esas nîno girewtiş.” 

 

Ganî bêvengî bêra şikitiş 

 

Zîlane qiseykerdişê xo yê peyênan de wina vat: “Semedo ke heqê merdiman yeno binpaykerdiş tepişteyî nînê dermankerdiş. Verê çiman de tepişteyî terkê mergî yenê kerdiş. Pêroyê welat de heqê merdiman yeno binpaykerdiş. La ganî na bêvengî bêra şikitiş. Ganî ma vera nê dejî de bêveng nêmanê. Ganî ma pîya têkoşîn bikerê.”