STENBOL - Temsîlkarê dezgehan 25ine serrgêra komploye de bi şîarê ‘heta tecrîd bêro şikitiş do rayîr ra şîyayîşê ma yê azadîye dewam bikero’ 8ê teşrîna verêne de verê Peykerê Boga yê Kadikoyî de do bêrê têkişt û eşkerayîyêke bidê. Temsîlkarê dezgehan vatî: “Ma tena vengê Abdullah Ocalanî nê ma azadîya fîzîkî zî wazenê. Her keso ke aştî wazeno ganî a roje uca de bo. Ma paweyê her kesî yê.” 

 

Kongreya Komela Demokratîke (KCD), Partîya Demokratîke ya Şaran (HDP), Partîya Çep a Keske, Partîya Herêmê Demokratîkî (DBP), Tevgerê Cinîyanê Azadan (TJA), Komeleya Paştîdayîşê Hetkarîya Merdimê Tepışteyan a Anadoluye (ANYAKAYDER), Komeleya Paştîdayîş û Hetkarîya Merdimê Tepişteyan a Marmaraye (MATUHAYDER), Komeleya Elewîyan a Demokratîke (DAD), Komeleya Huqûqnasê Seba Azadîye (OHD), Merkezê Kulturê Mezopotamya (MKM), Komeleya Cigêrayîşî ya Kurdî (Enstîtûya Kurdî) û Komeleya Taqîpkerdişê Koçberîye (GOÇÎZDER), serrgêra 9ê teşrîna verêne ya komploya mîyanneteweyî de do bi şîarê ‘heta tecrîd bêro şikitiş do rayîr ra şîyayîşê ma yê azadîye dewam bikero’ 8ê teşrîna verêne de kişta Peykerê Boga yê Kadikoyî de arê bibê û eşkerayîyêke bidê. 

 

Temsîlkara NÇMyî Dîla Suyu û temsîlkara Alinterî Muruvet Kuçuke derheqê çalakîye de qisey kerd.

 

Komplo vernîya paradîgmaye negirewt! 

 

Dîlane da zanayîş ke amacê komplo no bî ke vernîya paradîgmaya ‘demokratîk, azadîya cinî û ekolojîstî’ yê Abdullah Ocalanî bêro girewtiş û Abdullah Ocalan komplo veng bivejo zî hema komplo dewam kena. Dîlane wina dewam kerd: “Mekanîzmayê mîyanneteweyî pê nînê. Gamê huqûqî nînê eştiş. No parçeyê komplo yo. Azadîya Birêz Ocalanî azadîya heme şaran a. Paradîgmaya ci hetê her kesî ra yena qebulkerdiş.” 

 

Ganî waştişê azadîye de israr bibo! 

 

Dîlane dîyar kerd ke 31 aşmî yo tu xeberêke Abdullah Ocalanî ra nîna girewtiş û tecrîdo giran ra heme komel tesîr bîyo û vat: “Bi serran o ma derheqê kultur û ziwanê kurdkî de xebatan rayîr ra benê. Ma vera polîtîkayê asîmîlasyonî de yê. Tecrîd tesîrêk gird serê her raşteyî de kerdo. Raşteyê hunerî ser de zî kerdo. La çareserî no yo ke ganî ma azadîye de israr bikerê.” 

 

Dîlane bale ant serê rolê Abdullah Ocalanî yê aştîye de û seba çalakîya ke do pê bîyarê veng kerd: “Yewine waştişê ma aştîya fîzîkî ya Abdullah Ocalanî yo. Ma azadîya ci wazenê. Ganî tecrîd bêro wedaritiş. Seba pêameyîşê nê waştişî ganî game bêra eştiş. Ma her kesî 8ê teşrîna verêne de pawenê verê Peykerê Boga yê Kadikoyî. Wa her kes a roje uca de bo.” 

 

 Seba tewrbîyayîşê çalakîye veng 

 

Muruvet Kuçuke zî qiseykerdişê xo de nê çîyan ard ziwan: “Tecrîdê Îmraliyî tesîrêk gird serê heme zîndanan û hetê komelî de kerdo. Tecrîdê Îmraliyî heme raşteyê cuye de vila bîyo. Cinî, karker, ciwan wexto ke heqanê xo gênê yenê tehdîtkerdiş. Yenê tepiştiş. Raştê tedaye yenê. ganî vera tecrîdê serê Abdullah Ocalanî de her kes berpirsîyarîya xo bîyaro ca. Ez venga her kesî kena. Ganî seba şikitişê xover bidê. Ganî îqtîdar seba çareserîye gamanê pozîtîfan bierzo. Ma her kesî 8ê teşrîna verêne de pawenê çalakîye.”