AMED - Çarçeweya şerê taybet de her roje Kurdistan de metodêk yeno cerebnayîş. Na rey nîmeyê şewe şinê verê berê keyeyê Hazal Bayrame û wazenê seba testê DNAye ATKyî de gonî bida. Hazale dîyar kerd ke no metod seba viraştişê tersî yo.

 

Polîtîkayê taybet ê şerî her roje bi metodêk cîya Kurdistan û Tirkîya de yeno rayîr ra berdiş. Metodê ke nika yeno ceribnayîş zî seba vilakerdişê tersî yê mîyanê keyeyê kurdî yo. Xeylê cenazeyê ke netîceyê DNAye nêvejîyayî teslîmê keyeyan yenê kerdiş. Nêverdenê ke tay keye zî gonî bidê ke cenazeyanê xo tespît bikerê. Metodêk bîn zî Amed de ame ciwîyayîş. 

 

Lajê Hazal Bayrame Azîz Bayramî (Andok Amed), 9 serrî verê cû tewrê PKKyî bîyo. Nîmeyê şewe polîsan berê keyeyê Hazale piro danî û wazenê înan berê Dezgehê Tipê Edlî (ATK) ke seba lajê xo gonî bidê, la keye wexto ke şino ATKyî zî înan ra çîyêk nîno waştiş. Hazale derheqê babete de ajansê ma rê qisey kerd. 

 

‘Seba testî şewe ameyî verê berî’ 

 

Hazale da zanayîş ke şewe saet 02:00î de polîs ameyî verê berî û wina dewam kerd: “Saetanê şewe de ameyî berê ma piro dayî. Mi ber akerd. Vatî ‘Ganî ti ma reyde bêra û seba testê DNAye gonî bida’. Mi înan rê vat meymanê mi estê, wa bimano serê sibayî. La vatî ma do to berê û bîyarê. Mi berdî û gonî mi ra girewtî. Gelo semedê çi şewe yenê berê ma piro danê û tutê ke keye yê tersnenê. No metod nîno qebulkerdiş.”

 

 'ATKyî de mi rê çîyêk nêvatî’ 

 

Hazale dewamê qiseykerdişê xo de wina qala şîyayîşê xo yê ATKyî kerd û vat: “Wexto ke ez şîya uca de çîyêk mi rê nêvatî. Heto bîn de kênaya vistewreyê mi Ayşe Bayram bi kodê xo Evrîm Amede serra 2018î de Şirnex de dinyaya xo bedilnaye. Semedo ke dadî û pîyê aye dinyaya xo bedilnabî way û birayan ra waştî ke gonî bidê. La no 4 serrî yo ATK muracatê înan qebul nêkeno û aye goristanê bêkesan de ameya definkerdiş. Nika qey semedê ma wina kenê, ez fehm nêkena. Wexto ke destê merdiman de malumat çinî bo qey yenê verê berê keyeyî.” 

 

Wazenê keyeyan bitersnê 

 

Hazale dîyar kerd ke amac kenê ke ters bifînî zerrîya keyeyan û wina qiseykerdişê xo peynî kerd: “Her çî ardî sereyê ma. Ma her çîyî dî. Ma do êdî qey bitersê? Ma nêwazenê tutanê ma bitersnê. Xeylê reyan ameyî verê berê ma û wextê pandemîyî de zî telefon akerdêne, çîyan persayêne. Ma îna rê vat hayîya ma çîyêk ra çin a. Ma nê çîyî qebul nêkenê. Ma do wayîrê gerîla û şehîdanê xo bivejê.”