MERKEZÊ XEBERAN - Kênaya kurde ya 16 serrî Armîta Gîrawend ke bi hêrişê polîsên ê Îranî birîndar bî, 3 rojî qoma de ya.

 

Goreyê medyaya Îranî, kênaya kurde ya 16 serrî Armîta Girawend îstasyonêk ê metroyê Tehranî de rastê hêrişê ‘Polîsê Exlaqî’ yê Îranî ameya û 3 rojî yo qoma de ya.

 

1ê teşrîna verêne de roja yewşeme Armîta Grawend a 16 serrî ke şarê Kirmaşanî ra ya û roniştoxê Tehranî ya, dimayê îstasyonê metroyê Şuheda yê Tehranî de rastê hêrişî ameya û nika qoma de ya rewşa aye zî giran a.

 

Goreyê Komeleya Heqê Merdiman ê Kurdistanî agahîyê şahîdê hedîseyê girewte û vilakerde, demo ke wendekarê kênayî şinê îstasyonê metroyî, hîn polîsan înan îqaz kerdê ke bê hîcab ê û dimayê munaqeşayan, polîsêk derb dano Armîta û sereyê aye gêneno asin to û kewena erd. Sewbîna ame dîyarkerdiş ke dima ra bi hetkarîya embazanê xo wurzena û şina metro, la uca de hişê xo ser şina û kewena qoma.

 

Selahîyetdarê Îranî nê çî red kerdî û dîyar kerdî ke sebebê bê hişîya aye ‘dekewtişê tansiyonê aye ya gonî’ bîyo.

 

La rayîr vera vilabîyayîşê temamîyê dîmenî yê metroyî yeno padayîş û rayîr nîno dayîş ke rojnameger rapor serê hedîse de viraznê, heta rojnamegerêk/e ke şîyo/a nêweşxane, dimayê çend saetan hetê hêzê emnî ra destbend bîyo/a.