SÊRT - Qezaya Berwarî de tutêke bi hawayêkê sîstematîk raştê tecawuzî ameybî. Roniştişê diyîne yê tecawuzkarî ke serbest yeno muhakemekerdiş 5ê Teşrîna Peyêne de yeno dîyîş. Keyeyê tute û Baroyê Sêrtî venga wayîrvejîyayîşê dewaye kerdî. 

 

Roniştişê diyîne ê dewaya ke qezaya Berwarî de tutêke bi hawayêkê sîstematîk raştê tecawuzî ameybî û kerdoxê tecawuzî dewa ra serbest yeno muhakemekerdiş 5ê Teşrîna Peyêne de yeno dîyîş. Keyeyê tute û Baroyê Sêrtî venga wayîrvejîyayîşê dewaye kerdî. Dewa Berwarî ya Sêrtî de Huseyîn Tapar û Abdulhamît Şermetî destdergê bi tutêke kerdbî. Bado ke hedîse vejîya raşte keyeyê tute şî mudirîya polîsan û muracatê sucî kerd. Dimayê gerreyê sucî 8ê Teşrîna Peyêne ya 2022yî de derheqê wirdî kerdoxan de tehqîqat dîya destpêkerdiş. La vera qeydê veng û îfadeyan zî 11ê Teşrîna Peyêne ya 2022yî de hetê Serdozgerîya Perwarîye ra qerarê bêtaqîbî ame dayîş. Keye û avûkatî qerarê bêtaqîbîye vera muracatê dozgerîye ker. Îtîraz hetê Serdozgerîya Komare ya Sêrtî ra ame qebulkerdiş û derheqê Huseyîn Taparî de îdianame ame amadekerdiş. 

 

Mehkema roniştişê ewile yê 23yê Gulane de waştişê tepiştişê Huseyîn Taparî red kerdbî û semedo ke Abdulhamît Şermet tewrê roniştişî bibo û şahidê newe û qeydê vengî bêrî goşdarîkerdiş, roniştişê mehkema taloqê 5ê Teşrîna Verêne kerd. 

 

Datê tute Selahattîn Ş.yî venga wayîrvejîyayîşê dewaye kerd û vat: "Yew serrî ra zêde yo ke tute verê ma de nîya. Nêdîyena keye. Wexto ke rewşa tute ma wina biba senî faîl serbest gêrenê. Ez venga her kesî kena ke roja panşeme tewrê roniştişî bibê.”

 

Komîsyonê Heqê Tutan ê Baroyê Sêrtî zî serê hesabê xo yê dijîtale ra venga wayîrvejîyayîşê dewaye kerd.