Dîlan Babat

 

ANQARA - Hemsereka DFGyî Dîcle Muftuogluya ke hema zî zîndan de yena tepiştiş derheqê Roja Rojnamegeranê Cinîyan ê Kurdan de persanê ma rê cewab şirawite û vat: “Nagîhan Akarsel, Nujiyan Erhan, Denîz Firat, Ayfer Serçe hem bi têkoşînî û hem zî bi rojnamegerîya xo rayîr dayî vernîya ma.”

 

Gurbettelî Ersoza ke yewine mudira pêroyî ya cinî ya Tirkîya bî, 7ê Teşrîna Verêne ya 1997î de dinyaya xo bedilna. A roje ra nata rojnamegerê cinî qelema Gurbetellîye girewtî û vera zîhnîyetê serdestî yê camêrdî de û seba resnayîşê heqîqetî têkoşînêk gird danê. Semedo ke 7ê Teşrîna Verêne de Gurbettellî dinyaya xo bedilnaye serra 2014î de 7ê Teşrîna Verêne sey Roja Rojnamegeranê Cinîyan ê Kurdan ame îlankerdiş. 

 

Mîraso ke dewr ame girewtiş gird beno 

 

8ê Adara 2012yî de yewine Ajansê Xeberan ê Cinîye (JINHA) Bakurê Kurdistanî de dest bi weşanî kerd. Merkezê ci Amed bî û nimuneyê ci dinya de çinî bî. Ajans 29ê Teşrîna Verêne ra 2016î de ame girewtiş. Dima ra Gazete Şujin dest bi weşanî kerd û 25ê Tebaxa 2017î de o zî ame girewtiş. Nika bi JINNEWSî weşanê xo dewam keno. Cinî tena bi nê çîyan zî sînor nêmende û 9ê Çeleyê 2018î de JIN TVyî awan kerd. 

 

Hemsereka Komeleya Rojnamegeran a Dîcle Firatî (DFG) Dîcle Muftuogluya ke 3ê Gulane de Roja Rojnamegeranê Dinya de ameye tepiştiş û nika zîndanê Sîncanî yê Cinîyan de yena tepiştiş derheqê 7ê Teşrîna Verêne Roja Rojnamegeranê Cinî ya Kurdî de persanê ma rê ceab şirawite.

 

 'Ewnîyayîşê azadîwaştoxe ya cinî xo da teber’ 

 

 “Ez Gurbetelli Ersoz bi rêzdarî vir ana. Gurbetellî heme zîhnîyetê serdestî yê camêrdî yê çapemenîye de serûbin kerd. Yewine mudira cinî ya Tirkîya bî. Tebîî qet şik çin o ke Ozgur Gundem bî raşteyê awankarîya rojnamegerîya raşt. Çîyê ke nêameyêne nuştiş nuştêne. Vera heme astengîyan nê çîyî kerd. Na nuqta de ewnîyayîşê azadîwaştoxe yê cinî çapemenîya azade de xo da teber. Têkoşînê Gurbetellî ma ser de xeylê tesîr kerd. Gurbetelî û cinîyê ke mîrasê aye dewr girewtî pîya vera camêrd û vera xo de têkoşîn rayîr ra berdî. Na hete de heme vermuhakemeyan şikêna.”

 

 ‘Gurbetellî bê serkêşe’ 

 

Dîcle sewbîna wina qiseykerdişê xo dewam kerd û da zanayîş ke Gurbetellî Ersoze hetê averşîyayîşê rojnamegerîya cinîye de bîye serkêş û vat: “Destkewtişê ke ameyî destfînayîş heme dinya ser de tesîr viraşt. Hetê rojnamegerîye de ziwanêk awan bî. Hetê rojnamegerîya cinîye de çime ame awankerdiş. Ez zî mîyan de rojnamger wexto ke xeberêke virazenê ewnîyenê JINNEWSî û lazimî pê vînenê ke xebere bi kam ci terzî bêra viraştiş. Yan zî xeylê rojname û TVyî qetilkerdişê cinîyan nê, têkoşînê cinîyan kenê xebere.” 

 

 ‘Wazenê asteng bikerê’ 

 

 Dîcleye ard ziwan ke welatê sey Tirkîya ke faşîzm û despotî dewre de yo de şar nêeşkeno nefes bigêro û wina dewam kerd: “Krîzê ekonomî, şer, çaresernêkerdişê problemê kurdî, kiştişê cinîyan heme tebîî azadîya fikr û zîhnî çinî kenê. Keyepel, înternet û xeberê ke yenê sansurkerdiş. Embazê ma yenê tepiştiş û tehdîdkerdiş. Bi taybetî zî cinî û rojnamegerê cinî benê hedef. Wazenê cinîyan çinî bikerê. Yew bi yew destkewtişî destê înan ra yenê girewtiş. Semedê ma rojnamegerê cinî destkewtişê 30 serrî yo. Bi têkoşînêk demdergî reyde xeylê çîyî ameyî awankerdiş. Ganî vera hêrişan de reaksîyon bêro rêxistinkerdiş û girdkerdiş. Eksê ci nê nê ma do nêeşkê rojnamegerîya cinî xurt û gird bikerê.” 

 

 ‘Ma do vatişê xo bivajê’ 

 

 Dîcleye mesajê xo yê peyênan de seba Roja Rojnamegeranê Cinîyan ê Kurdan wina vat: “Ez şexsê Gurbetellîye de heme şehîdê çapemenîye vîra ana. Nagîhan Akarsel, Nujîyan Erhan, Denîz Firat, Ayfer Serçe hem bi têkoşînê xo û hem zî bi rojnamegerîya xo rayîr ma rê akerdî. Ez heme rojnamegerê cinî silam kena. Roja ma pîroz bo.”